16. 2. 2026: Одышов до вічности русиньскый скулптор Юрій Ґавула

13. фебруара 2026 у віцї 83 років умер Юрій Ґавула. Академічный скулптор Юрій Ґавула належав меджі вызначных монументалістів другой половины 20. стороча на Словакії. Хоць цїле доросле жытя пережыв у Братїславі, ниґда не забыв на свiй родный край, де ся все вертав, і на своє русиньске походжіня. Ёго монументалны творы мож найти по цїлій Словакії.

Академічный скулптор Юрій Ґавула народив ся 13. апріля 1942 у втогдышнїх Вышнїх Чабинах (днесь Чабины), в окресї Меджілабірцї. Зробив десяткы скулптур, пластік, основных каменів і рельєфів про здравотницькы будовы по цїлій Словакії. Довгы рокы тыж быв высокошкольскым педаґоґом, здобыв тітул доцента. Мав десяткы персоналных і колектівных выстав, быв участником на многых сімпозіях дома і в загранічу. Ёго творы суть в збірках дакілько ґалерій і музеїв.

Урна із тїлесныма остатками Юрія Ґавулы буде по погребных обрядах в Братїславі уложена до родічовского гробу в родных Чабинах. Вічная ёму память!