16. 3. 2026: До мадярьского парламенту выберуть і меншыны своїх представителїв

12-го апріля 2026 одбудуть ся парламентны вольбы, котры вырїшать о новім складї парламенту Мадярьска. По 16-ёх роках може Віктор Орбан і ёго партія Fidesz першый раз програти і дістати ся до опозіції. Баданя публічного мнїня довгодобо фаворізують партію TISZA, яку веде Петер Мадяр.

У змішаній сістемі волеб до земского сейму мають меншыны право выбрати собі свого посланця або говорцю. Выберати свого говорцю будуть і Русины.13 офіціално узнаных народностных меншын в Мадярьску має право в рамках парламентных волеб выбрати собі свого представителя в парламентї Мадярьска. Покля хоче меншына мати рядного посланця, котрый має і право голосовати, мусив бы даный єден кандідат здобыти 20 аж 25 тісяч голосів.

Ку Русинам приголосило ся у 2022-ім році 7 111 людей, і выберати будуть так як в попереднїх функчных періодах свого говорцю. У тій функції три функчны періоды (рр. 2014 – 2018, 2018 – 2022 і 2022 – 2026) была Віра Ґіріц. Родачка із Ужгорода, котра в Марярьску жыє од 1978-го року, тот рік уж не кандідує. Перед тым была довгы рокы і председательков Вседержавного русиньского самосправованя. Кандідачный список Вседержавного русиньского самосправованя про тоты выборы має вісем кандідатів. Лідером списку є Віктор Крамаренко, сучасный председа Вседержавного русиньского самосправованя. За ним наслїдують Віктор Ґіріц, Петер Гладинець, Віктор Дулишковіч, Янош Кожняньскый, Ґабор Варґа, Евелін Скиба і Анастазія Тіводар.