16. 4. 2025: В Будапештї одпремєрують новый філм о Теодорови Ромжови

Од 9-го до 11-го мая 2025-го року одбудуть ся в главнім містїі Мадярьска Днї хрістіаньскых філмів і книжок. Тот фестівал реалізує ся з підпоров Уряду председы влады Мадярьска, Фундації Ґабора Бетлена і Народного уряду про медії і комунікацію.

Головныма покровителями той події суть Жолт Шемєн – підпредседа мадярьской влады, і єпіскоп Тібор Берта – мадярьскый воєньскый ордінарій.

В рамках фестівалу 10-го мая вечур одбуде ся і премєра нового біоґрафічного філму під назвов Теодор Ромжа. Біоґрафічну драму о русиньскім священомученикови – мукачовскім єпіскопови Теодорови Ромжови, яка має 76 минут, наточів режісер Аттіла Бокор. В головній ролї як Теодор Ромжа представить ся мадярьскый актор Жолт Дер.

Премєра, на котру є потрібна в припадї інтересу о участь реґістрація, одбуде ся в Державнім кінї Uránia в Будапештї і на промітаню будуть участны і творцёве філму.

„По Другій світовій войнї припала Підкарпатьска Русь Совєтьскому союзу. Протицерьковны совєтьскы власти намагали ся зрушыти підкарпатьску Ґрекокатолицьку церьков. Мукачовскый єпіскоп Теодор Ромжа одшмарив зречіня ся своёй ґрекокатолицькой віры і порушіня приобіцяня даного Папови. Зато го у 1947-ім роцї з доволїным Сталіна брутално убили. Вмерти за Хріста значіть жыти навікы. У 2001-ім роцї го Папа Йоан Павел II. выголосив за блаженого. Філм основаный є на реалных дїях,“ пише ся в анотації ку новій біоґрафічній драмі о блаженім священомученикови Теодорови.

Припоминаме, же лем тыждень перед премєров філму, 3-го мая 2025-го року, в селї Білкы на Підкарпатю одбуде ся беатіфікація далшого новомученика із русиньской Мукачовской єпархії – слугы Божого Петра Павла Ороса.

Петро МЕДВІДЬ, ЛЕМ.фм, языкова і ґрафічна управа: АРК СР.