16. 6. 2016: На міністерстві выникне оддїлїня про освіту народностных меншын

Оддїлїня про выхову і освіту народностных меншын бы мало в другій половинї місяця юна 2016-го року выникнути на Міністерстві школства, наукы, баданя і шпорту Словацькой републікы. Про словацьку аґентуру SITA то в інтервю повів державный секретарь того міністерства Петро Крайняк (на фотцї). Выникнутём того оддїлїня хотять рїшыти проблемы, о котрых їх інформують школы із навчалным языком народностных меншын.

Державный секретарь высловив ся і ку рамковым навчалным планам. В сучасности єствує різніця в кількости годин навчалного языка в школах із навчалным языком словацькым і з навчалным языком народностных меншын. В школах з навчалным языком словацькым є тыжденно 31 годин словацького языка і літературы в першых штирёх класах основной школы. В основных школах з навчалным языком народностных меншын є од першой класы по четверту тыжденно на навчалный язык і літературу лем 21 навчалных годин. Крайняк підкреслив, же рамковы навчалны планы мусять зодповідати потребам меншыны і мусять брати до увагы і якость навчаня.

Резорт школства ся подля списку задач на тот рік має заміряти на веце областей в контекстї народностных меншын. Задачов міністерства на тот рік є і выроблїня концепрції розвитку навчаня русиньского языка і културы в матерьскых, основных і середнїх школах. Так само має міністрство тот рік выробити і навчалный текст про другый ступінь основных школ о історії і културї народностных меншын в Словацькій републіцї.

П. М., фотоґрафія: ujszo.com