16. 6. 2020: В Варшаві вернісаж выставы «Церкви на Лемковині»

В Музею Варшавской Архієпархіі в четвер 18. червця/юнія отворят експозицию рисунків Александра Хыляка пн. «Церкви на Лемковині». Выставу буде мож видіти до 30. серпня/авґуста 2020.

«В вакацийным періоді просиме на выставу рисунків Александра Хыляка, котры перенесут нас на полудньово-східню обшыр державы, на Лемковину. Александер Хыляк, по професиі архітект звязаный з Варшавом, але вродженый в Креници, в грекокатолицкій родині, од 60. років до тепер заховує на папери чарівны деревяны святыні з того реґіону» – поінформувала Івона Ґонсьорек з Музею Варшавской Архієпархіі.

Унікаты на світову скалю

На выставі вкажут коло 40 робіт зробленых розмаітыма техніками (угель, тинта, олувок і акварелі). В тексті, якій товаришыт експозициі, артиста признал, што лемківскы деревяны церкви оддавна сут обєктом його захопліня. «Сут дві причыны той фасцинациі. Першом є факт, што землі, на котрых ся находят, то тіж моя мала вітчызна. Лемковина, західня част Карпат замешкана Лемками, знана є з церковного будівництва для вірных східнього обряду. Сесе будівництво вписане є в пейзаж той землі, але тіж в єй культуровый краєвид, через што являт ся тырвалым елементом шыроко понятой европейской культуры» – пояснил А. Хыляк.

Додал тіж, што друга причына фасцинациі має джерело в архітектонічній професиі. «В центрі каждого рисуваного мном ляндшафту все находит ся архітектонічный обєкт, а церкви, хоц часом проєктуваны через аматора, місцевого творцю, возбуджают моє захопліня» – можеме прочытати в тексті товаришучым выставі. Артиста додал іщы, што церкви мают унікальный характер конструкциі.

«Історикы і любителі штукы, а тіж туристы, подивляют красны европейскы міста, палацы, замкы і костелы. Але такого феномену в обшыри сакрального буд.вництва, якым сут деревяны лемківскы церкви, неє ниґде. Іх краса захоплює, іх істория зворушат. Сут неповторным явиском» – чытаме дале слова архітекта.

Роботы Александра Хыляка презентували уж в Канаді ци Зъєднаных Штатах Америкы. Вернісаж выставы одбуде ся 18. червця/юнія о 16.00 год. Експозиция буде одкрыта до 30. серпня/авґуста.

Александер Хыляк

Александер Хыляк вордил ся в Креници. Предкы аристы были духовныма, учытелями, писателями. Дідо Євгеній был грекокатолицкым священником, а другій – Корнель Копыстяньскій, был парохом в Зындрановій. По закінчыню ІІ світовой войны родиче артисты оселили ся в Варшаві.

Др А. Хыляк є по професиі архітектом, долголітнім выкладовцьом і педаґоґом на Выділі Архітектуры Варшавской Політехнікы. Його пасийом є рисуваня. Малює угльом, тинтом, кредками ци акварелями. Утырвалят архітектонічны обєкты, особливі краєвиды з дітинства – лемківскы цекрви. Фасцинує го розмаітіст, ріжнорідніст композицийных розвязань, а тіж архітектонічный, рібярскій ци декоративный деталь та іконостасы.

Як архітект вельократні брал участ в археолоґічных місиях на обшыри Єгыпту, Сириі ци Судану. Спілпрацувал при выкоповых роботах веденых професором Казімєжом Міхаловскым.

Наталія МАЛЕЦКА-НОВАК, ЛЕМ.фм

(Публікуєме в оріґіналї – лемківскім варіантї русиньского языка.)

Script logo