16. 6. 2021: На Словакії списало ся 5,22 міліона людей. Пряшівскый край меджі найлїпшыма

Почас електронічной і асістованой формы списованя жытелїв на Словакії залучіло ся до цензусу 5,22 міліона людей. Цїлкове чісло списаных представлює 92,7 процента з одгадованой кількости населїня.

На віторковій (15. 6. 2021) пресконференції о тім інформовали представителї Штатістічного уряду Словацькой републікы. Інформацію принесла аґентура TASR.

В електронічнім списованю, котре проходило од 15-го фебруара того року до 31-го марца, самосписало ся 4,84 міліона жытелїв Словакії, што представлює 86 процент. В рамках асістованого списованя, яке зачало 3-го мая і закінчіло ся 13-го юна, прибыло далшых 376 тісяч списаных.

„Про нас тоты чісла суть успіхом, дякую каждому, хто ся списав,“ повів председа Штатістічного уряду Александер Баллек. Оцїнив комунікацію з партнерами Списованя жытелїв, домів і квартелїв 2021, підняв самосправы за сполупрацу коло списованя, але і інформованя з боку медій.

Пряшівскый край меджі найлїпшыма

Ґенерална директора Секції соціалных штатістік і демоґрафії Штатістічного уряду Людмила Іванчікова інформовала, же найвеце списаных жытелїв є із Жіліньского краю, де ся списало 94,6 процента людей.

Меджі три найуспішнїшы краї в списованю належать і Баньскобыстріцькый а Пряшівскый, де ся в обидвох припадах списало 94 процент жытелїв. „Баньскобыстріцькый і Пряшівскый край были вєдно з Кошіцькым краём лідрами в асістованім списованю,“ додала Іванчікова.

Єдиным крайом, котрый має під 90 процент списаных людей, є Братїславскый край. В главнім містї ся списало 88,4 процента з одгадованой кількости жытелїв. Збераня даных іщі не є закічене. Як пояснила Іванчікова, кедьже іде о інтеґроване списованя, в слїдуючій фазї ся іщі буде робити з адміністратівныма джерелами даных, котрых мають штатісты єденадцять. По порівнаню і доповнїню выйдуть фіналны чісла списованя.

Першы резултаты кінцьом року

Говоркыня Списованя жытелїв, домів і квартелїв 2021 Ясміна Штаудер інформовала, же почас списованя не зазначіли і не были голошены жадны рушывы обставины, ани міморядны сітуації.

Представителї Штатістічного уряду потвердили, же на кінцю того року бы мали публіковати першы аналізы списованя, котры дотулюять ся здобытых демоґрафічных, соціалных і културно-общественных інформацій.

Петро МЕДВІДЬ, ЛЕМ.фм, ґрафічна і языкова управа: ред. АРК в СР.