16. 6. 2026: Вышла книжка Мілана Ґая – Жывотны осуды / Žŷvotnŷ osudy

Мілан ҐАЙ, народженый 23. 7.1954 у Сукові, жыє, творить в Меджілабірцях, в сучасности выдав 16. свою публікацію в русиньскім языку, теперь в азбуцї і латиніцї (Пряшів: Академія русиньской културы в Словацькій републіцї, 2026, 104 стор., ISBN 978-80-89798-49-0.)

Русиньскый писатель Мілан Ґай є довготривало актівным автором і профіловав ся як поет духовной лірікы. В послїднїх роках але розшырив свій репертоар, публіковав книжкы з інтімнов і любовнов тематіков а попробовав публілованя і прозаічных повідань.

У найновшій книзї представлять віршованы пригоды. Формално мають подобу поезії, але несуть силный акцент на дїю і ясне моралне поучіня. Рітм і рім мають скорше рамкову функцію, важнїше про нёго є значіня вызнаму зображеных сітуацій. Тематічно ся занимать округом „жывотных осудів‟, суть то главно партнерьскы і родинны одношіня, позначены невіров, розлуков або розводом. Дакотры одношіня суть пробованы вспланутём любовных емоцій, іншы одходом на воєньску служну або за роботов за граніцї отчізны.

Найінтереснїшым знаком тексу новой книжкы є, же Ґай поужывать на описаня моралных прогрішків людей часто просту выповідь, містами аж грубый, якбы необробленый язык, котрый в комбінації з формалнов простотов і дослїдным рімованём звыразнює невгодность сітуацій і авторове моралне одсуджіня. Текст книжкы так описує способы роздумованя і оцїнёваня вартостей русиньской комуніты в приступній подобі. Тексты суть зрозумілы про шыроке коло чітателїв і рахують з чітателём, котрый на першый план кладе прямость і єднозначность завершіня „жывотных пригод‟. З высше спомянутых причін рекомендуєме тоту книжку на прочітаня.

Мґр. Михал ПАВЛІЧ, ПгД., Інштітут русиньского языка і културы Пряшівской універзіты в Пряшові.