16. 9. 2022: 80-роча од народжіня політічного дїятеля Підкарпатя – Івана МИГОВІЧА

Іван Миговіч нар. 17. 9. 1942 в Малій Мартинцї, яка была на теріторії Підкарпатя втогдышнёго Угорьска, теперь є на теріторії Україны, він є соціолоґом, учітелём на высокій школї і полїтічным дїятелём на Підкарпатьскій Руси.

І. Миговіч скінчів штудії на Україньскім поліґрафічнім інштітутї І. Федорова у Львові (1969), наслїдно здобыв  тітул кандідата наук (1973) і доктора наук (1986). Робив у централных орґанах Комуністічной партії у Москві аж до кінця 1980-ых рр., кедь ся вернув на Підкарпатя і зачав учіти на Ужгородьскій державній уніварзітї. І. Миговіч быв тыж єдным із закладателїв і першым директором (1992 – 1996) оддїлїня соціалных проблемів Карпатьского реґіону Інштітуту соціолоґії Народной академії наук Україны. В тым часї науковець робив баданя о ролї реліґії у сучаснім Підкарпатю. Меджі роботами на тоту тему треба спомянуть главно „Релігія і церкви в нашому краї‟ (1993).

І. Миговіч быв єдным із першых науковцїв посткомуністічного періоду, котрый обєктівно описав русиньскый народный рух того періоду у науковых выданях Кієва („Карпатські русини в контексті сучасного етнополітічного жыття‟, у сполуавторстві з Муколом Макаром. 1994). Много нарисів ученого обявило ся у зборнику „Слово за русинів‟ (1999). І Миговіч быв тыж председом Закарпатьского областного выбору Комуністічной партії і посланцём Верховной рады Україны (1998 – 2006), з трибуны якой часто пропаґовав неминучости узнаня Русинів самостатнов народностёв.

Здрой: Проф. Др. Павел Роберт МАҐОЧІЙ, „Енциклопедія історії та культури карпатських русинів‟ зоставителїв П. Р. Маґочія і І. Попа, (Ужгород: „Видавництво В. Падяка‟, 2010, с. 457), переклад із україньского языка: А. З