17. 1. 2025: ТАД одпремєрує монодраму О шкодливости табаку

Скапчаня двох тем – судьбы маленького чоловічка і чоловіка, котрый у своїм жывотї страчать вшыткы ілузії, з тым приходить нова пєса в репертоарі Театру Александра Духновіча (ТАД) в Пряшові.

Має назву О шкодливости табаку, і текст є твором Антона Павловіча Чехова. В новій монодрамі буде мож відїти Євґенія Либезнюка. Інсценацію режійно приготовив гостюючій режісер Растіслав Баллек, драматурґію і переклад на русиньскый язык робив Валерій Купка. Нову пєсу театер одпремєрує в пятніцю, 17-го януара 2025-го року, на Малій сценї.

Радо смотриме на чудже нещастя

Як на пресконференції ку новій премєрї повів драматурґ Купка, споминаны темы суть тіпічны і все актуалны в російскій літературї. Ку єдноактовці придав іщі пару мотівів із ґротесковых гуморесок о різных тіпах людей із ранёй творчости Чехова.

В інсценації выступать єдина постава, курячій із пасії, Іван Івановіч Нюхин. „Даєме позарателёви псіхолоґічный портрет боязливого чоловіка, боягуза, назвав єм го тіпічный підпапучник, котрый не має силы выслободити ся спід надвлады своёй пановачной жены. Помочі може му лем чудо,“ сконштатовав драматурґ.

Як признав режісер Баллек, монодрама є ёго облюбленым жанром. І зато радо прияв пропозіцію продовжовати у своїй довгорочній сполупраці з пряшівскым ТАД.

„Не знам чом, але про публіку суть найвдячнїшы поставы неґатівны, боягузы. Радо в театрї смотриме на чудже нещастя, бавиме ся на людьскых недостатках. Тота інсценація то дає в поставі Нюхина, а навеце іде о префайну акторьску нагоду грати чоловіка одпудливого,“ додав Растіслав Баллек.

Образ цїлой Росії

О шкодливости табаку буде по довгім часі першов премєров на Малій сценї ТАД. „На такій сценї тяжко дає ся позератель оциґанити, є так близко актора, же тот не має де скрыти ся,“ повів головный протаґоніста Євґеній Либезнюк.

На сценї тот раз у годиновій пєсї Либезняк не буде мати жадного партнера. Монодраму буде грати першый раз у своїй карьєрї. Подля нёго образ роздвоєного чоловіка, якым є Нюхин, котрый має проблем з тым, жебы зошмарити із себе рабску покору, є образ цїлой Росії, де панує традіція зробити маленькых людей барз нещастныма і невалушныма взяти свою долю до властных рук.

Як інформовав директор ТАД Маріян Марко, в далшім періодї Малу сцену чекать частїше вжываня. „Мі представлїня на тій сценї люблять ся, будеме ту грати О двох ґенералох, Пісковиско, а спробуєме ту дістати і далшы пєсы з нашого репертоару,“ повів Марко.

О шкодливости табаку є в 79-ій сезонї Театру Александра Духновіча за порядком 401-ов премєров, першов у тім календарьнім роцї.

Петро МЕДВІДЬ, ЛЕМ.фм, языкова і ґрафічна управа: АРК в СР