17. 11. 2019: Штець дістав двократну платінову платню

Штефанови Штецёви (всерединї зо шапков) „іде карта“. Выпродавать свої концерты, што ся потвердило і в рамках проходячого Štefan Štec & Fajta TOUR Jeseň 2019, а нелем то. Успішно ся продавать і ёго албум.

По веце як роцї од выданя дебутового діску під назвов Полетів бы-м на край світа належыть албум Штефана Штеця меджі найпродаванїшы на Словакії.

 

Двократна платінова платня

Штець є моментално на турне зо своёй ґрупув Файта. 9-го новембра концертовав у братіславскім клубі Atelier Babylon, а не быв то лем концерт. Почас події русиньскый співак перевзяв двократну платінову платню за кількость проданых дісків.

Штець продав зо свого дебуту понад 6 тісяч дісків, што є на словацькы реалії досправды шумне чісло, яке не досягують ани дакотры інтерпреты популарной музикы. При албумах з народнов музиков, як є то в припадї Штефана Штеця, суть такы чісла досправды великым вынятком.

„За остатнїх 10, може, 20 років собі не споминам, коли тот жанер досяговав такы чісла. Цїлково ся продало понад 6 тісяч фалатків фізічных дісків і то є барз добрый індікатор, котрым ся на словацькій сценї, без огляду на жанер, може похвалити лем узка ґрупа умелцїв. В нашій бранджі то потверджує міцне одношіня меджі любительом і умелцьом,“ цітує портал Gregi.net Маріяна Шокі, котры робить у сфері пордая музикы.

 

Албум припоминать домів

„Думам, же людям припоминать домів, корїня, походіжня і є щірый. Я то так чув, так єм то записав,“ повів на марґо оцїненого албуму Штефан Штець.

Домінік Маніак, котрый є прімашом Штецёвой капелы Файта, быв з оцїнїня несподїваный. „Мило ня то несподївало і потїшыло. Є то файный feedback од людей, за што їм дякуєме. Є то про нас сатісфакція за то, же сьме вытворили дашто, што не є першопланове і не забуде ся такой по выслуханю,“ повів прімаш.

Штець, котрый є теперь на турне, уж приготовлює выдати новый албум, котрый є вже готовый. Мав бы дістати до продая кінцём того року. Буде ся звати Дує вітор. Як повів співак, „буде свіжый, музично зрїлїшый, будуть там інтересны і неочекованы сполупраці а вірю, же людям принесе красны емоції“.“

Петро МЕДВІДЬ, ЛЕМ.фм, зудрой фотоґрафії: Штефан Штець.