17. 11. 2025: Град Любовня має зреконштруовану стїну і воєньскы касарнї

Реконштрукція севоровыдной стїны граду Любовня і ёго III. і IV. двора є докінчена. По двох роках інтензівной роботы дочекали ся обновы і воєньскы касарнї, котры обявили на градї по тім, як перед 15-ма роками впала стїна.

Як інформовала Леа Леготска із Оддїлїня комунікації Пряшівского самосправного краю, на інвестіції брали участь Міністерство културы Словацькой републікы і зряджователь Любовняньского музея – Пряшівскый самосправный край. Ставбу колавдовали 6-го септембра 2025-го року.

Днесь є град пыхов краю

Попри реконштрукції створив ся і новый простор про соколярїв, такзваный сколярьскый двір. Почас робот археолоґове нашли дакілько цїнных історічных артефактів, меджі нима горнцї, мискы, погары, монеты, мосяжну ґомбічку із мундуру вояка ці брытву.

„За остатнїх 20 років на градї зробив ся великый фалат роботы. Іщі не так давно быв град записаный як розвалина, теперь то пыха Пряшіского краю,“ повів Мілан Маєрьскый, председа Пряшівского самосправного краю.

„Вірю, же і тота остатня реконштрукція, котра одкрыла воєньскы касарнї і множество археолоґічных артефактів, буде далшым тяглом про навщівників. Першу археолоґічну експозіцію артефактів із штоденного жывота вояка із 17-го столїтя будуть годны видїти уж в слїдуючій лїтнїй сезонї,“ продовжовав Маєрьскый.

Приступны будуть просторы по стовках років

Перша археолоґічна експозіція воєнськых касарень із 18-го столїтя представить выбраты артефакты із археолоґічного баданя. Выстава буде мати і модерны інтерактівны елементы, навщівници ся дізнають веце о жывотї градного вояка, штоденных повинностях ґарнізону, значіню елементів обороны.

„Тов обновов граду комплетно закінчіла ся фортіфікація граду і зробив ся цїнный простор про новы експозіції і выставы під стрїхов. Музей планує презентовати жывот воєньского ґарнізону граду, котрый мав у часї скрываня польскых коруновачных дорогоцїнностей 250 хлопів. Навщівникам будуть сприступнены части граду, котры были неприступны стовкы років,“ повів директор Любовняньского музея Далібор Микулик.

Северовыходна стїна была колись вызначнов обраннов лініёв граду в тяжко доступнім теренї. Якраз тото положіня компліковало і роботы на реконштрукції. Вшыткы тоны каміня, котры были при реконштрукції схоснованы, робітници носили в руках. Реконштрукція почала в септембрї 2023-го року, закінчіли єй в авґустї 2025-го року.

Петро МЕДВІДЬ, ЛЕМ.фм, языкова і ґрафічна управа: АРК СР. Фото: Ян Салонь.