17. 2. 2025: Нова книга о Підкарпатьскій Руси меджі роками 1919 – 1939

Як інформує Общество приятелїв Підкарпатьской Руси на своїм офіціалнім сайтї, на книжковый рынок дістала ся нова інтересна публікація присвячена історії Підкарпатьской Руси в чехословацькім періодї.

Іде о нову чесько-анґліцьку публікацію під назвов Чехословацька „колонізачна“ політіка на Підкарпатьскій Руси меджі роками 1919 – 1939 (оріґінално Československá „kolonizační“ politika na Podkarpatské Rusi mezi lety 1919 – 1939), котрой автором є Ерік Лукас.

Автор в трёх капітолах занимать ся конштітучноправным вопросом Підкарпатьской Руси в рамках Чехословакії ёго розвитком почас 20-ёх років сполочной історії. Перша капітола занимать ся проблематіков і значінём колоніалізму і імперіалізму в конфронтації з поставлїнём Підкарпатьской Руси в новій републіцї.

В другій капітолї є описаный історічно-політічный розвиток того реґіону од 1848-го року аж до анексії – нового приєднаня до Мадярьска в марцї 1939-го року. В послїднїй капітолі автор курто занимать ся особов Томаша Ґаріка Масарика і ёго історічным і сучасным значінём про тот край. Окремы капітолы суть доповнены множеством знимок, і на кінцю публікації є цїла фотоґалерія роздїлена подля окремых місць в тім реґіонї.

Книга не є доступна у книжковых дістрібуторів, но мож єй купити посередництвом імейлового контакту на адресї masdem.tajemnik@gmail.com.

Петро МЕДВІДЬ, ЛЕМ.фм, языкова і ґрафічна управа: АРКСР.