17. 4. 2017: Пряшівскый архієпіскоп зрядив Гуменьскый вікаріят

Пряшівскый ґрекокатолицькый архієпіскоп і митрополіта Словакії Ян Бабяк на Святый і великый четверь, 13-го апріля 2017-го року, зрядив новый Гуменьскый архієпархіялный вікаріят із центром в Гуменнім. За першого гуменьского вікаря меновав отця ТгЛіц. ПаедДр. Мартіна Злацького, пароха Ґрекокатолицькой парохії Успенія Пресвятой Богородіцї в Гуменнім і протопресвітера гуменьского протопресвітерату. Архієпіскоп то оголосив на кінцю святочного богослужіня в Катедралнім соборі св. Йоана Хрестителя в Пряшові, на котрім брало участь веце як двасто священиків цїлой архієпархії. Інформовав о тім офіціалный сайт пряшівской архієпархії.

В декретї 1230/2017, котрым митрополіта зрядив новый вікаріят, ся пише, же так зробив ведженый старостливостёв о ёму звірену церьков, жебы мала ку діспозіції вшытко, што є потрібне про здобытя штонайвешкого духовного добра і про найдалекішы парохії Пряшівской архієпархії.

Новый вікарь буде в рамках свого вікаріяту душпатырьскы справовати теріторію, буде робити візітації парохій, по порадї з митрополітом скликовати днї священиків, засїданя протопресвітерів, літурґічны святкованя ітд. Буде брати участь на літурґічных празднованях і робочіх стрїчах Пряшівской архієпархії, пропоновати выміны священиків на парохіях і раз за квартал буде реферовати о вікаріятї. Гуменьскый вікарь має право носити хрест із окрашінём, набедерник і мітру. Так само дістав задачу дозоровати будованю новой будовы вікаріяту в Гуменнім.

 

Теріторію нового Гуменьского архієпархіялного вікаріяту творять протопресвітераты: Гуменне, Ганушівцї над Топлёв, Міджілабірцї, Снина, Стропків, Воронів над Топлёв і Воронів над Топлёв-Чемерне. Молодежный центер Барка в Юсковій Волї зіставать під юрісдікціёв Пряшова.

Новый вікарь быв інтронізованый до свого уряду на Світлый понедїлёк, 17-го апріля 2017-го року, о 9.00 год. при архієрейскій літурґії. Інтронізованый быв митрополітом.

Подїлена русиньска теріторія

Русиньскы актівісты, головно із Общества святого Йоана Крестителя, орґанізації, котра зробила вже множество літурґічных тлумачінь до русиньского языка, якы ся хоснують, довгы рокы жадають Пряшівску архієпархію о єпіскопа, котрый бы мав на старости душпастырьство Русинів. На тоты пожадавкы дотеперь не пришла позітівна одповідь. Навспак, зряджінём нового вікаріяту ся реално дїлить теріторія, котра є населена Русинами.

Покля протопресвітераты Міджілабірцї, Снина, часточно і Стропків а Гуменне, в котрых суть села, де ся люди голосять ку Русинам, ідуть під юрісдікцію Гуменьского архієпархіялного вікаріяту, під Пряшовом зістане Свідник, Бардеёв, Стара Любовня, де суть так само села із русиньскым жытельством.

Жрідло фотоґрафії: grkatpo.sk

П. М .