17. 5. 2026: Недавно ся нам дістала до рук Персонална бібліоґрафія професоркы Юлії Дудашовой-Крішшаковой

Тота бібліоґрафія з богатов текстовов і образовов частёв вышла з нагоды єй 80-роча од народжіня (Пряшів: Выдавательство Пряшівской універзіты в Пряшові, 2025, 172 стор., ISBN 978-80-553-3660-6). Едіторков бібліоґрафії є сама юбілантка – проф. ПгДр. Юлія Дудашова-Крішшакова, др. н., рецензентами суть: проф. ПгДр. Марта Пачікова, к. н., і проф. ПгДр. Петер Женюх, др. н. Технічныма редакторами суть Інж. Яросиав Гавріла і Мґр. Аліца Вєтошевова. Знама славістка дїє на Пряшівскій універзітї, в Центрї языків і култур народностных маншын, Інштітутї русиньского языка і културы.

Публікація мать такый обсяг:

• Жывотный юбілей Юлії Дудашовой-Крішшаковой автора Петра Женюха

• Жывотный юбілей вызначной славісткы авторкы ПгДр. Кветославы Копоровой, ПгД., унів. доц.

• Проф. ПгДр. Юлія Дудашова-Крішшакова в розговорї з Мартов Панчіковов

• Славістіка мі была дана до дару в розговорї з доц. Мґр. Мареком Мітком, ПгД., ДІС. арт.

• На словічко з юбілуючов проф. ПгДр. Юліёв Дудашовов, др. н.: „Річі одностно языка, народа і културї бы мали быти охаблены одборникам‟ в розговорї з Лукaшом Маргефком, главным редактором

• Бібліоґрафія творів професоркы Юлії Дудашовой-Крішшаковой за рокы 1970 – 2025

• Анотація (зо словацького до анґліцького языка переклала ПгДр. Ева Едді, ПгД.)

• Резюме

• Прилога (образова)

Персонална бібліоґраґія Ю. Дудашовой-Крішшаковой є цїнным матеріялом нелем про саму юбілантку, але і про шыршый світ славісткікы і высокошкольскых штудентів.

-аз-