17. 7. 2020: Юрко ХАРИТУН: Струны і віршы, Спокійность, Приповідковы орїшкы, Планета Земля (Стихы)

Юрко ХАРИТУН

 

СТРУНЫ І ВІРШЫ

Я не знаю

кілько струн на гуслях пукло

Здротованы уж не грають

А кілько віршів згорїло

не найгіршых

рімованых

аж жаль маю

Як спомяну на Карпаты

Зачінам писати

Зачінають гуслї грати

 

СПОКІЙНОСТЬ

Сердце било

За твоїм тїлом мене кортїло

Душа кипіла

Твоя краса маґнетом была

Спокійне сердце

Спокійна душа

З дїтинов на руках

 

ПРИПОВІДКОВЫ ОРЇШКЫ

Поколыше вітрик лїску

упадуть орїшкы

добренькы, здоровы

Мамцї я назберам

дві повны кешенї

Меджі ними будуть

і приповідковы

В єднім лїкы на мамины болї

В другім човник, весла

плавати до села

А в третїм під стрїхов

няй буде потїха

 

ПЛАНЕТА ЗЕМЛЯ

Світ такый великый

не перелетиш ёго за день

Наш край малый

же не можу наше гнїздо

найти у нїм

Прекрасна планета

наша Земля

Лїтати плавати ходити краса

Коли виджу нашу долину

збуряны села

Мушу плакати і я

 

(З приправлёваной книжкы Наш край – наш рай.)