17. 7. 2024: В Ужгородї рукоположыли нового мукачовского єпарху
Понад 2000 віруючіх, представителї властей, діпломатічных місій, десяткы єпіскопів із цїлого світа, множество священиків – тоты вшыткы зышли ся у віторок, 16-го юла 2024-го року, в Хрествоздвиженьскім ґрекокатолицькім катедралнім соборї в Ужгородї, жебы брати участь на великім торжестві Мукачовской ґрекокатолицькой єпархії.
В тот день, коли єпархія припоминать собі свято Чудотворной Іконы Мукачовской Пресвятой Богородіцї, быв рукоположеный і інтронізованый на єпіскопскый столець новый мукачовскый єпарха – Преосвященый владыка Теодор Мацапула.
Папа римскый Франціск призначів владыку Теодора за мукачовского єпарху 8-го мая 2024-го року. Матірь Церьков про наслїдників Ужгородьской унії, русиньской традіції, має од того дня нового правлячого єпіскопа.
Єрархы із цїлого світа
Головным святителём владыкы Теодора быв Высокопреосвященый Володимір Війтишин, архієпіскоп і митрополіта івано-франківскый, котрый нового владыку рукоположыв і на діакона а священика.
Далшыма святителями были Высокопреосвященый Йона Максим, архієпіскоп і митрополіта пряшівскый, і Преосвященый Ніл Лущак, помічный мукачовскый єпіскоп, дотеперішній апостольскый адміністратор Мукачовской єпархії.
Окрем них зышли ся на торжестві єрархы із цїлого світа. Участь взяв архієпіскоп Вісвалдас Кулбокас – апостольскый нунцій на Українї. На єпіскопску хіротонію пришли і єрархы Церьквей русиньской традіції. Із Словакії пришов кошіцькый єпарха – архієпіскоп Кіріл Василь, емерітный архієпіскоп і митрополіта пряшівскый кір Йоан Бабяк ці емерітный торонтьскый єпарха владыка Маріян Андрій Пацак.
З Мадярьска пришли вшыткы трёме єрархы – Высокопреосвященый Філіп Кочіш, архієпіскоп і митрополіта гайдудороґскый, владыка Атаназ Орос, мішколцьскый єпарха, і владыка Авел Сочка, котрый є ніредьгазьскым єпархом і сам є родаком із Підкарпатя.
Участны были і представителї Піттсбурзькой русиньской митрополітной церькви, за котру пришов Высокопреосвященый Вілъям Скурла, піттсбурґскый архієпіскоп і митрополіта, і владыка Роберт Піпта, пармскый єпарха. Далше меджі участныма мож было відїти наприклад і владыку Ґеорґія Джуджара, єпарху з Руського Керестура, і далшых.
На торжестві Мукачовской єпархії, котра є церьквов свого права, брав участь і глава Україньской ґрекокатолицькой церькви – Блаженїшый Святослав Шевчук, верьховный архієпіскоп києво-галицькый і митрополіта київскый, як і далшы єпіскопи УҐКЦ з Україны, але і з Европы, Америкы і Австралії.
На єпіскопску хіротонію пришли і представителї іншых конфесій з Підкарпатя ці римокатолицькы єпіскопи на Українї.
Одзвучало веце языків
Торжественна архієрейска літурґія, почас котрой владыка Теодор прияв єпіскопску хіротонію і быв інтронізованый на столець правлячого єпіскопа, была на церьковнославяньскім языку.
Но почас літурґії одзвучали і далшы языкы, в котрых брали ся єктенії ці іншы части, наприклад україньскый, мадярьскый, словацькый ці анґліцькый. Як пізнїше в приговорї повів Высокопреосвященый Філіп Кочіш, якраз церьковнославяньскый язык є єден із тых елементів, котрый нас, наслїдників Ужгородьской унії, капчать, хоць бісїдуєме днесь на різных языках.
Проповідь тримав на літурґії апостольскый нунцій на Українї, архієпіскоп Вісвалдас Кулбокас.
По літурґії з поздоровлїнём ку новому мукачовскому єпіскопови приговорили ся апостольскый нунцій, Блаженішый Святослав Шевчук, Высокопреосвященый Йона Максим, Высокопреосвященый Вілъям Скурла, Высокопреосвященый Філіп Кочіш, єпіскоп Віталій Скомаровскый – глава Конференції римокатолицькых єпіскопів Україны, і на кінцю приговорив ся владыка Ніл Лущак, котрый майже штири рокы вів єпархію як адміністратор.
На самім кінцю торжества першый раз як мукачовскый єпарха приговорив ся участным і владыка Теодор Мацапула.
Петро МЕДВІДЬ, ЛЕМ.фм, ґрафічна а языкова управа АРКСР.
