18. 5. 2025: Націоналне свято тот рік в Будапештї

Вседержавне русиньске самосправованя в Мадярьску шторік в місяцї май орґанізує Русиньске націоналне свято, яке є скапчане з передаванём Премії імени Антонія Годинкы. Каждый рік тота подія проходить в іншім містї.

Тот рік Русиньске націоналне свято одбуде ся в суботу, 24-го мая 2025-го року, і Русины з Мадярьска одсвяткують свій праздник в століцї країны – Будапештї.

Головным покровителём той події є Мікловш Шолтес – державный секретарь Державного секретаріяту Канцеларії премєра з вопросів реліґійных і націоналных капчань, котрый покровительство перевзяв вєдно із Віров Ґіріц – представительков Русинів у Парламентї Мадярьска.

Свято почне в пополудняйшых годинах молитвов Акафісту, котрый буде одслуженый в Ґрекокатолцькій церькви святого Михаіла, на уліцї Бабейр. Далше буде културный проґрам продовжовати в просторах Културного центра імени Йожефа Атілы в Будапештї.

Із святочныма приговорами будуть выступати Віктор Крамаренко – председа Вседержавного русиньского самосправованя, Каталін Сілі – головный радник мадярьского премєра і бывша предситателька мадярьского парламенту, і Золтан Фюрєш – заступник державнoго секретаря Державного секретаріату Канцеларії премєра з вопросів реліґійных і націоналных капчань.

Тот рік в рамках културного проґраму привітають на Русиньскім націоналнім святї гостів із Словакії. Із Гуменного прийде выступати Фолклорный колектів Хемлон.

Петро МЕДВІДЬ, ЛЕМ.фм, языкова і ґрафічна управа: АРК СР