18. 6. 2025: Озвены Вовчіх гор капчають традіцію, природу і радость про цїлу родину

Пририхтуйте ся на днї повны музикы, смаків і фареб природы. Фестівал Озвены Вовчіх гор, котрый одбуде ся в днях 18-го аж 19-го юла 2025-го року у селї Влыч, знова ожывить сердце Народного парку Полонины, і позывать людей із цїлой Словакії, а нелем, спробовати унікатну атмосферу найвыходнішого куточка Словацькой републікы.

Тот вынятковый фестівал, найстаршый в Сниньскім реґіоні, котрый одбуде ся під звіздным небом Парку темного неба і в обнятю карпатьскых лїсів, є святом русиньской културы, традічного ремесла і жывота в гармонії з природов.

В оточіню, де стрїчать ся покій природы із пулзуючім духом комуніты, собі каждый прийде на тото своє.

То нелем о музиці, але і навернутю ку коріням

Озвены Вовчіх гор не суть лем фестівалом, але і навернутём ку корїням. Богатый проґрам принесе выступлїня фолклорных ансамблів, співацькых ґруп, солістів, як і концерты сучасных музикантів, котры іншпірованы суть народныма мотівами.

На сценї представлять ся і дїтячі колектівы, чім фестівал потверджує, же култура ту жыє через ґенерації.

Сердцём фестівалу суть містны ремеселници, подникателї, котры принесуть тото найлїпше із своёй роботы. Навщівници можуть тїшыти ся на ярмарок повный традічных ремесел, якы собі можуть на місцї і спробовати.

Дїти можуть тїшыти ся на творчі вытварны, танечны і музичны ці ремеселны варштаты, гры в природї, забавны атракції, і контакт із звірятками, покля дорослы підуть на бісїды, выставы, і якостный културный проґрам.

Вынятковы Полонины

Фестівал орґанізує ся в унікатнім оточіню Народного парку Полонины, котрый знамый є найтемнїшым небом на Словакії, стародавныма буковыма пралїсами і вынятковов біодіверзітов. Навщівници можуть скапчати културный зажыток із турістіков, ціклотурістіков ці прогульками по пралїсах, ку деревяным храмам, котры суть записаны на Списку світовой дїдовизны UNESCO.

Озвены Вовчіх гор – то нелем фестівал. То місце, де стрїчать ся минулость із сучасностёв, чоловік із природов, а комуніта із навщівниками. Не запізнийте шансу быти частёв той події, котра лишыть слїды у вашім сердцї. Про веце інформацій можете навщівити вебсайт фестівалу Озвены Вовчіх гор.

Мґр. Домініка НОВОТНА, ЛЕМ.фм