18. 7. 2017: Фолклор дорослых присвяченый Чокиновій у Вігорлатьскім музею

Вігорлатьскый музей в Гуменнім кличе любителїв, підпорователїв і носителїв фолклорных традіцій ку участи на реґіоналнім конкурзї автентічной фолклорной музикы і співу – Музичный фолклор дорослых.

Реґіоналне коло про окресы Гуменне, Снина і Меджілабірцї буде проходити 16-го септембра 2017-го року в ареалї сканзену Вігорлатьского музею в Гуменнім.

Конкурз є заміряный на ожывлёваня і всокочіня традічного фолклору реґіону Вышнёго Земпліна як вызначного елементу културной дїдовизны реґіону. Частёв події буде і споминковый проґрам присвяченый памяти недожытых 70-ых народенин Марії Чокиновой (на фотцї горї злїва), родачцї зо села Убля, вызначній русиньскій інтерпретцї автентічного фолклору.

Конкурзна переглядка є заміряна інтересуючім ся в соло і дуо співі, співацькым ґрупам, народным музикам і солістам-інштрументалістам. Про приголошіня ся до конкурзу є треба мати вік мінімално 15 років, музичный репертоар лем з областей Вышнёго Земпліна, і выступати треба в народнім крої. Хто має інтерес брати участь на конкурзї, треба то оголосити до 25-го авґуста 2017-го року на адресї: Vihorlatské múzeum v Humennom, Námestie slobody 1, 066 01 Humenné і на копертку написати Regionálna súťaž hudobného folklóru dospelých 2017. Вшыткы детайлны інформації мож найти і на офіціалнім сайтї Вігорлатьского музею в Гуменнім.

Журі выбере із выступаючіх окремых інтерпретів і колектівы, котры будуть пак выступати на 11-ім річнику Фестівалу славяньской взаємности, котрый буде проходити в тот самый день, 16-го септембра 2017, по закінчіню конкурзу в Гуменнім.

П. М.

Script logo