18. 8. 2024: В любовняньскім сканзенї мож відїти жывот русиньскых дротарів

До Музея народной архітектуры під замком Любовня перед часом прибыв новый обєкт, котрым є деревяна хыжа з Камюнкы. Як інформовала Даша Єленёва із Оддїлїня комунікації Пряшівского самосправного краю, в деревянім домі мож посмотрити на жывот дротарів, котрыма тото русиньске село прославило ся.

Хыжа з Камюнкы, котра была сприступнена навщівникам сканзену, є зрубовый дім, якый быв збудованый у 1934-ім роцї. Актуално в нїм музей презентує експозіцію під назвов Дротарї одходять.

Найновшый обєкт в сканзенї в Старій Любовнї належав іщі в 1930-ых роках дротарёви і хователёви быків Антонови Курцінови. Зато там была і наіншталована експозіція, котра розкрывать навщівникам жывот дротарїв із Спіша.

З боку тіполоґії то єднотрактовый дім, котрого обытна і господарьска часть суть під єднов стрїхов. Обытну часть творить ізба і сіни, до господарьской части належыть стайня, шопа і боїско.

В части переднёй ізбы обєкту находить ся експозіція, котра зображує родинный обряд повязаный із одходом чоловіка. У вступных сінях на то надвязує уж експозіція дротарьства, і то в ёго традічній вандровній подобі заникнутого ремесла, яке было скапчане з одходом хлопів із бідной отцюзнины до заграніча.

Музей в тых днях одкрыв і постоянну експозіцію з назвов Лазориків фундуш, котра є наіншталована в ареалї камянно-деревяной господарьской будовы, в боїску з Руськой Волї, котре збудовав маїтель Юрій Борчак у 1945-ім роцї.

Петро МЕДВІДЬ, ЛЕМ.фм. Ґрафічна і языкова управа: АРК в СР.