19. 10. 2020: Цїна ПСК удїлена і за Колоніцьке сідло

Цїну Пряшівского самосправного краю (ПСК) за 2020-ый рік дістануть академічный скулптор Штефан Коваль, доктор Маріян Кріж і директор Вігорлатьской звіздарнї Іґор Кудзей. Як в понедїлёк, 19-го октобра 2020-го року, інформовала пресаґентура TASR, комісія про удїлёваня публічных оцїнїнь ПСК выберала спомеджі 17-ёх дорученых номінацій.

Посланцї ПСК цїну удїли директорови Вігорлатьской звіздарнї в Гуменнім Іґорови Кудзеёви за цїложывотне дїло присвячене пропаґації астрономії і незамінительный вклад при зряджіню астрономічного комплексу европского значіня на Колоніцькім сідлї, котрый став центром позорованя, едукації і популарізації астрономії.

РНДр. Іґор Кудзей, к.н. (1957 р.) выштудовав наперед фізіку на Універзітї І. І. Мечникова в Одесї, пак на тій універзітї на Катедрї астрономії здобыв тітул кандідата фізікално-математічных наук.

Астрономічна обсерваторія на Колоніцькім сідлї находить ся на теріторії Парку темного неба меджі русиньскыма селами Колоніця і Ладомирів. Є деташовным робочім місцём Вігорлатьской звіздарнї. Якость колоніцького неба призначіла тоту обсерваторію ку здобываню высокоякостных науковых даных, як і ку популарізації і розвитку астротурістікы.

Вігорлатьска звіздраня там має своє деташоване робоче місце, збудоване, жебы выконовати опдборне позоровательске діятельство. Головным робочім апаратом є Вігорлатьскый народный телескоп – того часу найвекшый телескоп на Словакії. Так само є на Колоніцькім сідлї хоснованых дакілько далшых меншых апаратів.

Вручаня Цїн Пряшівского самосправного краю одбуде ся 16-го децембра т. р. Окрем трёх лавреатів Цїны ПСК, прибудуть і удостоєны Цїнов председы ПСК, о котрых вырїшыть жупан Мілан Маєрьскый.

Петро МЕДВІДЬ, лем.фм, на фотоґрафії: Обсерваторія на Колоніцькім сідлїі, автор Ян Штовка, языкова управа: ред. АРК в СР.