19. 11. 2025: Партнеры із словацького і польского боку в Заґужі підписали договор о сполупраці

Як інформовало місто Меджілабірці на своїм офіціалнім сайтї на сітї Facebook, дня 14-го новембра 2025-го року в Заґужі одбыла ся стрїчa польско-словацькых представителїв турістічного руху і културы в рамках партнерьского проєкту під назвов Черезгранічне подорожіня в часї із віртуалным монахом, котрый є фінанцованый із проґраму Interreg Польща – Словакія 2021 – 2027.

„Подїя проходилиа в Центрї културы Foresterium, котрый находить ся в прекрасных розвалинах кармелітаньского монастыря, якы суть єдным із найвыразнїшых сімболів реґіону,“ інформовало місто.

Цїлём стрїчі было підпорити розвиток черезгранічных інтеґрованых турістічных понук, посилнити роль културы і турістічного руху в економічнім розвитку теріторії і помочі ку соціалній інклузії. „В рамках проґраму занимали сьме ся резултатами дотеперїшнїх проєктів Interreg Польща – Словакія, і тым, як новы атракції збогачують понуку реґіону.“

Як далше інформовало місто Меджілабірцї, єднов із рихтованых новот є цїлорічна експозіція із голоґрамом монаха, іншталована внутрї обєкту Foresterium. „Тота модерна форма презентації історії уможнить розшырити турістічну сезону на цїлый рік – без огляду на погоду ці актуалны условія.“

Тота стрїча мала і далшый важный пункт, котрым было підписаня взаємного Договору о сполупраці, якый іщі веце укрїплять довгорічне партнерство меджі польскыма і словацьмыа субєктами. „Вдяка нёму можеме продовжовати в сполочнім розвитку турістічных продуктів і ефектівно надвязовати на успішны актівности Interreg Польща – Словакія.“

Меджілабірцї інформовали, же довгодоба сполупраца міста і Ґміны Заґуж приносить до реґіону новы принагоды в области културы і рекреації. Вєдно будують ся перепоєны турістічны трасы, модерны навщівницькы атракції, і черегранічный розвиток посувать ся на высшу уровень.

Цїлковы кошты споминаного проєкту представлюють скоро 39 тісяч евр, із чого дотація із Европского фонду реґіоналного розвитку творить 80 процент цїлковых коштів.

Петро МЕДВІДЬ, ЛЕМ.фм, языкова і ґрафічна управа: АРК СР