19. 8. 2017: Марка фурт ювілює
Хоц єдна з найвыдатнійшых русиньскых дам співу, Мария Мачошкова, свій округлий ювілей 60 років співу празднувала влони, тот рік дальше продолжат свій праздник. Неодолга, під конец місяця, выступит 29. серпня/авґуста т.р. в Ґіральтовцях, де єй концерт одбуде ся під наголовком Марка ювілює. 60 років співу.
В рамках концерту, якій зачне о 16.00 год., выстипит не лем ювілятка, але і запрошены гості. Подібні як при влонишнім ювілейным концерті, якій м.ін. проходил під покровительством бургомайстра міста Свидник, вчас ґіральтовскых выступлінь на сцені запрезентуют ся декотры з артистів, котры з Мачошковом выступували в вересни/септембрі 2016 рока во Свидницкым Домі Культуры. Будете мочы посмотріти на Музыку Мілана Рендоша, солистку Мариянну Железну, Тріо Світковых ци Фольклорний Ансамбль Варґовчан. Подію буде модерувал народний розповідач Йошко Йошка.
Мачошкова народила ся 30. марця 1940 рока в русиньскым селі Потічкы. Як видно з ювілейных концертів, свою сценічну карєру веде уж 60 років. Своі першы музычну успіхы Марка отримувала по завершыню школы і вступліню до товдышнього Піддуклянського українського народного ансамблю в Пряшові (ПУЛС), з якым як хористка та перша солистка выступувала в 1956-1998 роках. Мария Мачошкова за рокы свойой творчой роботы вытворила вколо себе леґенду дамы русиньской співанкы, не лем дома, але тіж в русиньскых еміґрантскых кругах, ци серед Лемків, якы нашли ся м.ін. вчас выгнаня на заході Польщы. Ювілятка перше з ПУЛС-ом, а пак сама як народна солистка одбыла вельо турне по світі, фурт вказуючы русиньскій народний спів. Руска Бурса в Ґорлицях мала чест гостити Марию Мачошкову в своіх просторах в половині 2016 рока, коли співачка пришла прикрасити округлий ювілей 25-літя реактивациі общества Руска Бурса в Ґорлицях та 5-літя од покликаня першого лемківского радия ЛЕМ.фм.
(Публікуєме в оріґіналї – лемківскім варіантї русиньского языка.)
