19. 8. 2025: Позваня на 5. МЕДЖІНАРОДНЫЙ КОНҐРЕС РУСИНЬСКОГО ЯЗЫКА 10. – 12. септембра 2025 у Пряшові

Важены членове русиньскых орґанізацій, інштітуцій, выдавателї, мілы русиньскы актівісты в днях 10. – 12.  септембра 2025 ся в Пряшові одбуде юбілейный 5. Меджінародный конґрес русиньского языка, котрый орґанізує Інштітут русиньского языка і културы Пряшівской універзіты в Пряшові. 

В рамках супроводного проґраму конґресу хочеме дати простор одпрезентовати Вашу орґанізацію/інштітуцію/выдавництво і Вашу роботу. Коментована презентація ся одбуде 11-ого септембра од 17:00 до 18:00 годины, но є потрібне ся на містї находити уже од 11:30 годины, жебы од 12:00 годины уже были розложены вашы матеріалы (банеры, книжкы а под.), котры можете презентовати і продавати.

Орґанізатор Вам забезбечіть їджіня на тот день (обід, вечеря).

Вашу участь нам потвердийте до 1. 9. 2025.

На мотузку www.sdu.sk/kongres найдете вшыткы інформації о конґресї а занедовго і цїлый проґрам конґресу.

Тїшиме ся на стрїтнутя з Вами в Пряшові!
 

За орґанізачный выбор супроводного проґраму конґресу Мґр. Домініка Новотна, Пряшівска універзіта в Пряшові, Центер языків і култур народностных меншын, Інштітут русиньского языка і културы, Ул. 17. новембра 1, 080 01 Пряшів