19. 9. 2018: Пряшівска архієпархія святкує. Представили памятну плакету

Дводнёвов меджінароднов науковов конференційов на Ґрекокатолицькій теолоґічній факултї Пряшівской універзіты в Пряшові під назвов 200 років Пряшівского ґрекокатолицького єпіскопства у четверь, 20-го септембра 2018-го року, зачнуть централны святкованя Юбілейного року Пряшівской ґрекокатолицькой архієпархії 2018.

Святкованя будуть проходити аж до неділї, 23-го септембра 2018. Пряшівска ґрекокатолицька архієпархія собі в юбілейнім роцї припоминать веце історічных дій, головныма суть 200 років од основаня єпархії, котра оддїлила ся од Мукачівской єпархії, 50 років од обновлїня церькви в Чехословакії і 10 років од выголошіня метрополітной церькви sui iuris і піднята Пряшова на архієпархію.

 

Участь буде брати 30 єрархів

Як інформовав аґентуру TASR владыка Іоан (Бабяк), пряшівскый архієпіскоп і метрополіта Словакії, в суботу, 22-го септембра 2018, одбуде ся головна літурґія святковань в базиліцї в Лютинї. На тоту часть святковань є наголошеных 30 єпіскопів. Гостём суботняйшой архієрейской літурґії буде і префект Конґреґації про восточны церькви кардінал Леонардо Сандрі, котрый буде мати проповідь. Меджі 30-ма архієпіскопами і єпіскопами будуть домашні, но і тоты споза граніць.

В недїлю святкованя завершыть ся в Пряшові церьковнославяньсков архієрейсков літурґіёв, котру будуть служыти в Катедралнім соборї св. Іоана Хрестителя.

 

Памятна плакета і поштова знамка

В рамках юбілейного року вышла і памятна плакета, котру в середу, 19-го септембра 2018, одпрезентовали на пресконференції, яка проходила на Архієпархіялнім урядї.

„На переднїй сторонї є мотів деревяной церькви, бо то сімбол нашой церькви. Конкретно іде о Церьков св. Михаіла Архістратига у Фрічцї із 1829-го року. Тот храм має приблизно 200 років, значіть мапує історію нашой церькви. Перед храмом є зображена ікона Краснобрідьской Богородіцї. То далшый із сімболів і того юбілейного року і єдна з найстаршых, і бізовно найкрасшых ікон,“ повів про аґентуру протосінкел Пряшівской архієпархії Любомір Петрик.

Плакета є выроблена із мосяжи із бронзовов патінов, з низкым рельєфом і діаметром 60 міліметрів. Автором є академічный скулптор Михал Ґавула і была зроблена у монетній фабрицї в Кремніцї.

Як сьме вже скоріше інформовали, із нагоды юбілейного року выдасть Словацька пошта і поштову знамку в емісії Уменя із датов 19-ый октобер 2018, на котрій буде ікона Краснобрідьской Богородіцї. Ґрафіку знамкы робив словацькый рытець поштовых марок Франтїшек Горніяк. Їй інавґурація є напланована на 10-го новембра 2018 в Катедралнім соборї св. Іоана Хрестителя в Пряшові.

 

Далшы святочны події продовжують до кінця року

В октобрї ґрекокатолици із Словакії будуть путовати до Рима. В рамках того історічно першый раз одбуде ся окрема авдієнція ґрекокатоликів із Словакії у папы римского Франціска.

Далшы актівности суть напланованы на новембер і децембер9-го аж 11-го новембра 2018 в рамках святковань юбілейного року одбуде ся в Пряшові XXVII. річник Меджінародного фестівалу духовных співанок візантійского обряду. Тот буде проходити в пряшівскім катедралнім соборї.

У віторок, 11-го децембра 2018, на Великій сценї Театру Йонаша Заборьского в Пряшові одбуде ся святочный ґалавечур, почас котрого будуть выступати співачкы русиньскых народных, але і церьковных співанок Анна Сервіцька і Моніка Кандрачова, но і далшы інтерпреты, як, наприклад, оперный співак Мартін Бабяк.

Петро МЕДВІДЬ, жрідло: лем.фм

Script logo