2. 3. 2021: Америцькы Русины підперают списову кампанію у Старім Краю

Америцкы Русины підперают Русинів в Польщы і на Словациі в кампаніі до Нацийонального Повселюдного Спису. Зрыхтуваны были пропаґандовы материялы.

Діяня мают обняти заєдно Русинів в Польщы, як і на Словациі. Промоция Нацийонального Повселюдного Спису 2021 ведена єст через Карпаторусиньскій Дослідничый Центр в ЗША (Carpatho-Rusyn Research Center).

Коріня і ціль

Цілю підкрисліня звязків Русинів з Америкы зо Старым Краюм, т.є. обшырю Карпатской Руси, а і днешніх місц прожываня русиньской діаспоры на чужыні в Польщы, активісты русиньской дослідничой плятформы – Карпаторусиньского Дослідничого Центра в ЗША, выстартували з пропаґандовом капмапнійом.

Кампанія збудувана є на пару фундаментах. Першым з них єст одкрытый лист в языках анґликым, польскым, словацкым і русиньскым (лемківскым). Листы окремо зрыхтуваны были про Русинів в Польщы і Словациі. В кампанійній одозві до Лемків в Польщы пише ся м.ін.: «як громадяне Зъєднаных Штатів Америкы і Канады гордиме ся лемківском достоменністю і надієме ся, же сте так само горды зо свойой лемківской спадковины. Тогорічный Повселюдный Спис ма шансу представити докладне чысло Лемків в Польщы, і дякуючы тому зміцнити лемківскє соспільство на цілым світі».

Дальше пише ся, што русиньскы активісты зза океану з надійом позерают на Лемків, якы жыют в демократичній Польщы, державі, яка узнає і допомагат своім нацийональным і етнічным меншынам. Америцкы Русины споминают, што днес Лемків має в чести цілый світ, а лемківска культура збогачат культуры держав, де наша меншына прожыват.

Другым з промоцийных материялів єст фільм опубликуваный на каналі YouTube, де знаны Лемкам в Польщы Мария Сільвестрі і Джон Ріґетті розправляют на тему списуваня і заохочуют до того вшыткых, якы гордо чуют ся Лемками. В пароминутовым відео, якє ведене єст по анґлицкы, обзерач годен чытати польску трансляцию выповіди.

Дальше Карпаторусиньскій Дослідничый Центр в ЗША зрыхтувал специяльны летучкы, афішы, котры доступны будут в електронічній версиі на вшелеякых плятформах, такых як Facebook, Instagram ци Twitter. Образы з промоцийныма банерами были уж зрыхтуваны подля вымогів і вымірів, якы обовязуют в социяльных медиях.

Банеры, якы передали Русинам в Старых Краю америцкы Русины, можут быти свобідно хоснуваны через каждого, хто буде мал на тото дяку, так само через русиньскы орґанізациі. Заохочат ся до шеруваня материялами з додаваньом гаштаґу #smerusyny та #rusyncensus. Хто бы хотіл отримати пакєт промоцийных материялів, пиште на radio@lem.fm. Перешлеме вам іх.

Нацийональный Повселюдный Спис 2021

В майли, якій америцкы Русины розослали до чысленных лемківскых/русиньскых орґанізаций, підкрислят ся значыня спису, кєд за остатні декады вказували они на збільшыня ся офіцийоного чысла Лемків/Русинів в Старым Краю.

По 1989 р. в Польщы і на Словациі каждый з дальшых списів вказувал проґрес, кєд іде о декляруваня русиньской (лемківской) нацийональности та русиньского (лемківского) языка як рідного, материньского языка, хоснуваного наштоден.

Примірово офіцийне чысло Лемків в Польщы в 2011 р. взглядом спису з 2002 р. збільшыло ся близко двократно (з 5 863 до 10 531). Значучый проґрес был і серед Русинів на Словациі, де в 2011 русиньску нацийональніст задеклярували 33 482 особы, зас 55 469 осіб задеклярувало русиньскій як свій рідный язык.

Тогорічный Нацийональный Повселюдный Спис заплянуваный єст в Польщы на місяці квітен/апріль – червец/юній. На Словациі повселюдне списуваня уж тырват, зачало ся 15. лютого/фебруара і буде до 31. марця.

Севериян КОСОВСКЫЙ, ЛЕМ.фм

(Публікуєме в оріґіналї – лемківскім варіантї русиньского языка.)