2. 7. 2018: Русины обернули ся писмом до києвской канцеларії Рады Европы

Із датумом 19-ый юн 2018-го рока было загнане писмо Мортенови Енберґови, председови канцеларії Рады Европы в Києві, од русиньскых представителїв Підкарпатя і Северной Америкы. Русины жадають выповнїня пятёх пунктів.

Писмо опередила особна стріча Енберґа із председом Народной рады Русинів Закарпатя Євгеном Жупаном і честным председом Світовой рады Русинів Павлом Робертом Маґочіём. Тота проходила іщі 4-го юна 2018-го року в Києві. На нїй было Мортеном Енберґом запропоновано, жебы Русины написали свої пожадавкы, котры бы ся мали просадити на теріторії Україны.

В писмі, під котре, окрем Жупана і Маґочія, підписав ся і Николас Купеньскый, председа Світовой академії карпаторусиньской културы, є наформулованых пять пожадавок. Русины жадають узнаня Києвом свого народа як окремого, котрый не є жадным субетносом іншого народа. В слїдуючім списованю населїня на Українї жадають мати окремый код про записованя і розрізнїня русиньской народности як окремой. Так само є пожадоване узнаня русиньского языка як окремого славяньского языка. На теріторії днешнёй Закарпатьской области Україны русиньскы представителї жадають запроваджіня навчаня русиньского языка і културы на основных школах. Із школством є повязана і остатня пожадавка. На Факултї історії Ужгородьской націоналной універзіты жадають засновати центер або катедру карпаторусиньскый штудій – карпаторусиністікы.

Вєдно із писмом быв загнаный два і пів сторінковый апендікс, в котрім ся окремы пункты києвскій канцеларії Рады Европы детайлнїше пояснюють.

Рада Европы є меджінародна (меджівладна) орґанізація европскых держав, котрой головным цілём є охрана людьскых прав і укрїпляня плуралітной демокрації, даваня вкладу до усвідомліня і розвитку европской културной індентічности, гармонізація права европскых держав, гляданя рїшінь на проблемы як ксенофобія, меншыны, охрана жывотного оточіня ітд. Так само помагать выходноевропскым державам при їх модернізації і при демократізачных реформах. Україна є членом Рады Европы од 1995-го року.

Петро МЕДВІДЬ