20. 10. 2018: Приправа світовой премєры

Приправа світовой премєры інсценації Домовина у Театрї Александра Духновіча (ТАД) у Пряшові вступила до заключной фазы, кедьже є напланована на піятніцю, 26. октобра 2018. Реалізачный колектів під веджінём гостюючой режісеркы Адріаны Тотіковой в послїднїм часї мав дакілько екзаменів.

Подобно як перша премєра ТАД у тій сезонї 2018/2019 – Обіцянкы в режії Матуша Олгы – так і тота дістала дотацію з Фонду на підпору културы народностных меншыв СР.

Інсценація на основі тексту молодого словацького автора Міхала Балажа, родака з Гуменного. З гумором высувать цїлый ряд днесь актуалных вопросів, наприклад, чім є домовина про днешнёго молодого чоловіка, котрый ся вертать з перебываня за роботов зо заграніча, як і ці суть нарушены односины у днешнїй родинї. Іде о першу такого роду сполупрацу молодого драматіка з ТАД, але в тій самій сітуації є і режісерка А. Тотікова, так само родачка з Гуменного, котры ся занимать режіёв нелем у театрї, але і в телевізії., В інсценації у ролях родічів ся представлять Людміла Лукачікова І Васинь Русиняк, сынів грають представителї молодой ґенерації в ТАД – Ладіслав Ладомиряк і Михал Куцер, обоми абсолвенты штудій на Академії уменя в Баньскій Быстріцї. Першый із них, родак із Збоя, заграв собі роль Мішка у попереднїй премєры Обіцянкы під веджінём свого бывшого педаґоґа М. Ольґы. І М. Куцер, котрый походить,із Свідника, обявує ся скоро в цїлім актуалнім репертуарї ТАД (є на інтернетовій сторінцї, на адресї: www.divadload.sk).

ТАД як єдьный театер на Словакії грає свої інценації в русиньскім языку.  Балажів текст переложыв до русиньского літературного языка Ярослав Сисак.

Окрем іншого, драматічный колектів ТАД выступить 24. октобра 2018 із гров Тяпаковцї (режія М. Ольга) на фестівалї Театралный Спіш, іде о десятый річник презентації інсценацій словацькых театрів.

Веджіня ТАД приправує пресконференцію к інсценації гры Домовина у вівторок, 23. октобра 2018 о 9.00 год.

Осиф ЮРЧІШИН, драматурґ ТАД, контакт: 0905 328 633