20. 11. 2021: Вышнїй Земплін буде репрезентовати нове лоґо

Найдеме в нїм деревяну церьков і одказ на Варгола.

Реґіон Вышнїй Зепмлін буде репрезентовати нове лоґо. При ёго творїню Областна орґанізація турісточного руху (ООТР) Вышнїй Земплін і Вышнїй Шаріш выходила з первістной верзії, котра ся хосновала до 2012-го року.

Лого подля Михаелы Здражіловой, выконной директоркы ООТР Вышнїй Землін і Вышнїй Шаріш, презентує вшыткы важны атрібуты той теріторії, котры суть упорядкованы до штирьох областей: історія, култура, природа і вода. Інформовала о тім аґнетура TASR.

„Головнов причінов, чом мы вырїшыли про редізайн лоґа є то, же хочеме ся приспособити актуалным сполоченьскым і технічным трендам. Візуална ідентіта є барз важным елементом, котрый репрезентує реґіон. Нашым цїлём было, жебы лоґо Вышнёго Земпліна вызерало репрезентатівно і было якостно ґрафічно оброблене. Єдночасно сьме хотїли, жебы оддзеркалёвало філозофію реґіону, котрый хоче быти лібералным ку формам презентації, але конзерватівным ку цїнностям, котры суть з ним неоддумательно звязаны,“ повіла Здражілова.

В правій части лоґа видиме деревяный храм, на лївій сторонí є латиньска буква P, котра своїм тваром строму має подля Здражіловой одказовати на найцїннїше природне богатство Вышнёго Земпліна, котрыма суть карпатьскы буковы пралїсы в Полонинах.

„Спідня часть лоґа належыть водї, котра представлює далше найвекше богатство реґіону, ці уж в подобі Домаші або водного резервоару Старина,“ інформовала далше Здражілова.

Одказ на послїднїй елемент, котрым є култура, мож подля їй слов відїти в самім фаребнім оброблїню лоґотіпу. Способ зображіня надвязує за словами Здражіловой на pop-art і ёго найславнїшого представителя Енді Варгола, котрого родічі походили з Вышнёго Земпліна, зо села Микова.

Петро МЕДВІДЬ, Лем.фм. Ґрафічна і языкова управа: ред. АРК в СР.