20. 12. 2018: Приносиме вам нову рубріку
Офіціално 4. януара 2019 отваряме на нашій інтернетовій сторінцї нову рубріку ЛІТЕРАТУРА.
Єй потреба взникла з того, же сьме того погляду, же так, як даколи сьме створили літературный додаток ПОЗДРАВЛЇНЯ РУСИНІВ у бывшых НАРОДНЫХ НОВИНКАХ, потім літературный додаток під таков самов назвов у часописї РУСИН, так треба створити іщі шыршый простор главно про публікованя літературных творів, респ. уривків із тых творїв, котры іщі не были публікованы, ай на інтернетовій сторінцї АКАДЕМІЯ РУСИНЬСКОЙ КУЛТУРЫ В СЛОВАЦЬКІЙ РЕПУБЛІЦЇ. Тым хочеме дати іщі шыршый простор про презентацію ся русиньскым писателям Словакії і приспіти к розвитку русиньской літературы на Словакії. Также кажду пятніцю будеме Вам приносити все новы літературны творы різных жанрів у русиньскім літертурнім языку.
То є главный цїль і обсяг новой рубрікы ЛІТЕРАТУРА на нашій інтернетовій сторінцї. Але, жебы сьме обогатили тоту рубріку, так сьме вырїшыли приносити в ній ай інформації о выданю новых книжок в русиньскім літературнім языку на Словакії так, як быв кодіфікованый у 1995 роцї, а то азбуков! Тыж в тій рубріцї ся обявлять рецензії на выданы книжкы в русиньскім языку і медайлоны о русиньскых писателях. Дотеперь тоты інформації і медайлоны выходили в рубріках КУЛТУРА, ОЦЇНЇНЯ або ЮБІЛАНТЫ. Але сьме того погляду, же як літертурны творы русиньскых писателїв, так і статї о їх выданях і о них самых мали бы мати самостатну рубріку.
Нову рубріку ЛІТЕРАТУРА будуть приправлёвати одборный асістент Інштітуту русиньского языка і културы Пряшівской універзіты в Пряшові Мґр. Міхал Павліч, ПгД., котрый в тій інштітуції веде годины русиньской літературы, як і я, як шефредактор інернетовой сторінкы Академія русиньской културы в Словацькій републіцї. Нова рубріка не хоче конкуровати інтернетовій сторінцї Сполку русиньскых писателїв на Словеньску, ани конкурзу o Літературну премію Марії Мальцовской, навспак, хоче іщі веце розшырёвати творы русиньскых писателїв, котры пишуть в русиньскім літературнім языку. Рубріка хоче быти прикладом дотримованя кодіфікації русиньского норматівного языка на Словакії у 1995 і наслїдных у них змінах. Як ся нам то подарить, укаже час. Як ся рїшыте, так можете новы і непублікованы літературны творы у русиньскім списовнім языку посилати на адресу: Mgr. Michal Pavlič, PhD., Ústav rusínskeho jazyka a kultury, Prešovská univerzіta v Prešove, 17. novembra č. 15, 080 01 Prešov. Обалку з літературныма творами треба означіти: ЛІТЕРАТУРА про інтернетову сторінку АРК в СР.
Также приємне чітаня новой, дотеперь не публікованой, русиньской літертуры на Словакії, як і статей о ній і їх писателях. Віриме, же новов рубріков потїшыме як авторів споминаной літературы, так і єй чітателїв, і чітателїв нашой інтернетовой сторінкы. Также летьте до світа, пташкы літературны – творы у рубрицї ЛІТЕРАТУРА.
Мґр. Александер ЗОЗУЛЯК, шефредактор інтернетовой сторінкы Академія русиньской културы в СР
