20. 3. 2017: Нова книжка о Адолфови Добряньскім

Під назвов „Adolf Dobriansky, významný predstaviteľ Rusínov 19. storočia“/

Адолф Добряньскый, вызначный репрезентант Русинів 19. стороча (Свідник, 2017, 54 с.) была перед пару тыжднями выдана тота  публікація, котра присвячена Обществу св. Йоана Крестителя. Нова книжка першыраз была публічно представлена на Памятнім дню в честь Адолфа Добряньского, першогo председы Общества св. Йоана Крестителя.

Тоту подію зорґанізовало уведжене общество у Чертіжнім 4. марца 2017.

Главный обсяг книжкы є написаный по словацькы, лем вступ, істы всувкы і тексты під ілустрачным матеріалом суть написаный по русиньскы азбуков. Зато сьме вырїшыли, із согласом автора о. Мґр. Мілана Ясика, же главный обсяг переложыме до русиньского літературного языка на Словакії і опублікуєме го в часописї Русин у 4 продовжінях, то значіть, же переложеный текст буде в нашім часописї выходити аж до кінця 2017 року, котрый є роком Адолфа Добряньского.