20. 4. 2017: «Далі контра Варголь. Штука, музыка, фільм» – выстава во Варшаві

Більше як 120 робіт Далього і Варголя буде мож обзерати во Варшаві од 22. квітня/апріля. Выстава «Далі контра Варголь. Штука, музыка, фільм» буде доступна в Палаци Культуры і Наукы.

В столици Польщы загосит двох бодай найбарже характеристичных артистів ХХ столітя – Сальвадор Далі та Енді Варголь. Контроверсийны артисты уж за жытя стали ся леґендом, а іх роботы перешли до істориі, зміняючы при тым світ штукы. Оба конечно креували тото, як постерігали іх вшыткы довкола. Провокували, выкликували скандалі, фурт затерали границі медже жытьом а штуком. Были ексцентричны, здивачалы і контроверсийны, прото єдных цікавили, захопляли, а другы мали для них лем зневажливіст. Знали іх вшыткы, чул о них каждий. Інспірували поколіня артистів, мали влияня на штуку, музыку і фільм ХХ столітя. Оба любили славу і грошы. Далі отримал перезвиско Avida Dollars (Жадаючий Гроши), якє было анаґрамом його мена. Варголь твердил, же в місце образу за 200 тис. дулярів ліпше повісити на стіні грошы.

Орґанізаторы выставы підкрисляют, же вельо з привезеных творів іщы николи не было вказуваных в Польщы. Експонаты походят з приватных колекций і фундаций штукы. Вказуют на ріжниці і на тото, што лучыт обох артистів. Вшыткы творы сусідуют зо знаныма інсталяциями і комерцийныма проєктами та знимками, трактуваныма як особливий запис хвилі.

Публика перекрачаючы поріг выставы входит через символічну браму з кружучых банкнотів. Пак являют ся черговы поміщыня і брамы – Брама Мерилин Монро, Брама Кіна, якы навязуют до іконічных фільмів Сальвадора і Ендіого. Сут і ориґінальны ґрафікы, різбы, ескізы. На смисель нюханя влият Святиня Запаху Далього. Обовязковым пунктом выставы сут ряды погрудя з перуками Варголя і баюсами Далього. Любителі ручной мануфактуры, під оком інструктора серіґрафіі, будут мочы зробити свою кошельку з надруком в специяльні зрыхтуваным варштаті серіґрафіі. Буде мож і войти до реплікы середины славной Фабрыкы Варголя – леґендарного ателє артисты в Ню Йорку, де не лем творил, але проводил цілий свій час з нюйоркском богемом. Для любителів музыкы перлином буде колекция ориґінальных окладинок платен вельох ансамблів, якы спілпрацували з Варгольом, м.ін. Rolling Stones ци Velvet Underground. Колекцию здобыто од приватного зберача, скорше не была николи презентувана. Окладинкы занимают головне місце выставы і сут єдныма з найважнійшых експонатів. Звиджаня выставы кінчыт ся на перекрочыню ефектовной Брамы Чупа Чупс. Опакуваня лизаків чупа-чупс запроєктувал Сальвадор Далі.

Варголь перший раз стрітил ся з Далім літом 1965 рока в престіжовым нюйоркскым готели St. Regis Hotel. Далі запросил Ендіого до апартаменту 1610, котрий часто занимал. Присутний был тіж Давід МакКабе, фотоґраф, якій мал удокументувати стрічу. Подля його реляциі, Далі вложыл на голову Варголя вкрытя, якым прикрашали ся Інкове. По пятьох некомфортовых минутах Енді рішыл выйти, а МакКабови казал знищыти неґатив зо знимками, на котрых видно як сідит в особливым вкрытю головы. На наступній стрічы Далі обвязал Варголя кудільом і вылял на него фарбу. Через наступных двадцет років Енді буде іщы вельократні одвиджал Сальвадора, хоц тот все буде прібувал провірити, як далеко може посунути ся вчас стріч. В 1978 році Далі офірувал Варгольови особливий подарок – цілу торбу плястиковых схоснуваных ним танірів. Енді был захоплений Сальвадором. Подарок барз му ся подабал.

Выставу мож видіти до 7. жолтня/октобра т.р. Офіцийний сайт выставы найдете за тым мотузком.

Наталія МАЛЕЦКА-НОВАК

(Публікуєме в оріґіналї – лемківскім варіантї русиньского языка.)