20. 5. 2016: Одбыла ся передпослїдня премєра 70-ой театралной сезоны ТАД у Пряшові

Конкретно 20. мая 2016 на великій сценї Театру Александра Духновіча в Пряшові то была 1. премєра гры (хоць в 70. театралній сезонї юбілуючого ТАД  у Пряшові передпослїдня) Петра Ковалчіка Корчма під зелечным стромом і підназвов Словацька рапсодія по русиньскы у режії Матуша Ольгы.

Обсяг пєсы ся одогравать в часї великой господариьской крізы у 30-ых роках 20-го стороча. Приносить нечекано актуалны темы – безробітность, еміґрація ці здичавілость міджілюдьскых односин в одлюдщенім сполоченьскім оточіню. Тоту ровину внимаме може іщі актуалнїше, як в часї єй взнику. Наперек дотулїня ся твердой реаліты днешнёго світа, гра несе в собі і надію на лїпшый жывот, віру в позітівны вартости чоловіка і підштовхує  позерателя к жывотній актівности, жебы вхопив свою судьбу до властных рук. В тім нам тота пєса дакус припоминать славного Ґорького На днї. Спомянута гра юбілуючого драматіка Петра Ковалчіка (в тім роцї ся дожывать своїх вісемдесятин), нашла в Театрї А. Духновіча в Пряшові вшыткы передположіня, абы проузвучала у своїх сытых драматічных, як і лірічных ці медітатівных ровинах. А к тому ся причінили, окрем режісера, ёго асістент О. Патлікаш, авторы сцены Я. Даубрава, костімів Г. Безакова, музикы П. Янічка і перекладатель зо словацького до русиньского языка Я. Сисак. Самособов , же к успішній реалізації пєсы в непослїднїй  мірї приспіли і герцї М. Ґайдошова, Л. Лукачікова, Л. Ладомиряк, О. Ткач, В. Русиняк, Л. Міндош, М. Куцер, Е. Либезнюк, М. Ільканин, В. Чема, І. Стропковскый, С. Шковранова, І. Латта, О. Патликаш і співачкы З. Ковалчікова, Д. Либезнюк і Я. Сисакова.

По премєрї была гостина споєна з ославов успіху гры, як і святкованём 70-річа Театру А. Духновіча в Пряшові.

2. премєра, 366. премєра цілково і послїдня в юбілейній 70. сезонї на великій сценї Театру А. Духновіча буде в середу 25. мая 2016 од 19.00 год. Щіро Вас позываме.

-р-