20. 5. 2016: Презентація ІРЯК ПУ у Свіднику

В рамках проґраму 4. Русиньского фестівалу в Свіднику в середу 25. мая 2016 ся одбуде презентація Інштітуту русиньского языка і културы Центра языків і култур народностных меншын Пряшівской універзіты у Пряшові.

 

ПгДр. Кветослава Копорова, ПгД., одборна асістентка інштітуту, штудентам свідницькых середнїх школ у просторах Середнёй здравотной школы у Свіднику представить акредітованы бакаларьскый, маґістерьскый і докторьскый штудійны проґрамы – русинькый язык і література.

 

Мґр. Зденка Цітрякова і Мґр. Михал Павліч, інтерны докторанды ІРЯК ПУ, представлять далшы можности познаня, котры будучіх штудентів чекають в рамках штудій уведженых штудійных проґрамів. Міджі нима ай семестралны перебываня на партнерьскых універзітах в рамках Европской унії і таксамо в мімоевропскім контекстї. Інштітут має до того часу підписаный договор з Карловов унівезітов у Празї, Універзітов у Новім Садї в Сербії, причім в  лїтнїм семестрї того академічного року уж проходять першы вымінны перебываня штудентів обидвох універзіт, Універзітов A. Міцкіевіча у Познанї і Педаґоґічнов універзітов у Кракові в Польщі, Універзітов Фрідріха Шіллера в Єнї і Фрайбурґсков універзітов у Нїмецьку. Уведжены універзіты мають інштітуты, котры ся занимають і карпаторусиністіков або подобным проґрамом в рамках выходных славяньскых языків і можуть прияти на єден семестер штудентів в рамках штудентьскых мобіліт европского проґраму ЕРАЗМУС ПЛУС. Даный проґрам того року вывжыють штуденты ІРЯК ПУ ай в часї лїтнїх вакацій – двоє штуденты підуть на два місяцї (юл – авґуст) до Польщі, де будуть здобывати практічны скушености з роботы в народностных медіях – конкретно в інтернетовім лемківскім радію ЛЕМ.ФМ в Ґорліцях.

      Окрем того, Пряшівска універзіта має підписаны білатералны договоры з Высшов духовнов школов Ф. Ґала в Сеґедї в Мадярьску і Торонтьсков універзітов в Канадї, шпеціално заміряны на карпаторусиністічны штудії, на основі якых можуть вєдно реалізовати едукачны, научны і едіторьскы проєкты.

-кк-