20. 7. 2021: Лавреатами Премії Антонія Годинкы стали Василь Бойчук і Ласло Пушкаш

16-го юла 2021-го року одбыла ся в Будапештї традічна научна конференція присвячена памяти академіка Антонія Годинкы. В рамках конференції одбыло ся і передаваня Премії Антонія Годинкы за 2021-ый рік.

Орґанізаторами події были Вседержавне общество русиньской інтеліґенції Антонія Годинкы, Столичне русиньске народне самосправованя і Русиньскы самосправованя VI. a VIII. раёну Будапештії.

Конференцію одкрыв Штефан Лявинець (на фотцї ззлїва), председа Світового конґресу Русинів. Участь брали і Ґеорґій Фірцак, член Світовой рады Русинів за Румунію, а Мартін Караш, председа Русиньской оброды на Словеньску, котрый у Світовій радї є за Русинів Словакії.

Лавреатами Премії Антонія Годинкы за 2021-ый рік стали ґрекокатолицькый священик і довгорічный член Світового конґресу Русинів з Румунії отець Василь Бойчук (на фотцї справа), і ґрекокатолицькый священик, малярь, родак з Ужгорода, отець Ласло Пушкаш. Пушкаш є, окрем іншого, і автором книжкы Кир Теодор Ромжа. Життя і смерть єпископа.

Участны могли на конференції выслухати пять лекцій. Ласло Годинка бісїдовав о споминах на свого дїда Антонія Годинку. Творчость свого отця – маляря і теолоґа Ласла Пушкаша, представила ёго дївка проф. Бернадетт Пушкаш, котра дїє на універзіті в Ніредьгазї.

Далшыма, котры чітали лекції на тему Антонія Годинкы, были Др. Йожеф Ботлик і Йожеф Балоґ. З позначков выступив і лавреат тогорічной премії, отець Василь Бойчук, котрый бысїдовав на тему Русины і віра в Бога.

Як інформовав председа Русиньской оброды на Словеньску Мартін Караш, на події в Будапешті доїднали ся і участници русиньского меджінародного вытварного пленера, котрый є напланованый тот рік в Бардеёвскых Купелях. Так само наплановала ся на Словакії і выставка русиньского маляря жыючого в Мадярьску – Андрія Манайла.

Петро МЕДВІДЬ, ЛЕМ.фм, ґрафічна і языкова управа: ред. АРК в СР.

Script logo