20. 9. 2020: В Старій Любовнї бісїдовали о народній співанцї

Як інформовав Любовняньскый освітнїй центер, в суботу, 12-го септембра 2020-го року, в просторах Дому културы в Старій Любовнї одбыв ся 17-ый рочник Семінара о народній співанцї під покровительством пріматора Старой Любовнї Любоша Томка.

Головный орґанізатор – Общество музичного фолклору, тот семінар орґанізує шторік в іншім містї на Словакії. Довгодобов темов є баданя, документація і едіції народных співанок.

Любовняньскый освітнїй центер і місто Стара Любовня як сполуорґанізаторы позвальи десять реферуючіх, котры ся занимали областёв словацько-польского приграніча на северовыходї Словакії. Веце рефератів дотуляло ся якраз русиньского фолклору.

Першым реферуючім быв Мартін Караш, директор Любовняньского освітнёго центра і председа Русиньской оброды, котрый мав реферат під назвов Народна співанка в народностно змішанім реґіонї Старой Любовнї. О традічнім вецеголоснім співі в селї Шамброн бісідовав Мілан Щіґулиньскый, котрый є і ведучім Фолклорной ґрупы Шамбріньцї. Ева Фаберова пресдставила Народну співанку в селї Якубяны – од колыскы по гроб.

Анна Деревяникова із Пряшівской універзіты в Пряшові бісїдовала о шпеціфіках русиньскых народных співанок. Русиньскый етноґраф Іван Чіжмарь із Свідника презентовав тему під назвов Основы теренного баданя народных співанок.

Як освітнїй центер далше інформовав, єдным з выступів семінара, котрый люде могли смотрити і онлайн, буде і збірник рефератів, якый має быти выданый в найблизшых тыжднях.

Петро МЕДВІДЬ, лем.фм, жрідло фотоґрафії: Ľubovnianske osvetové stredisko, языкова управа: ред. АРК в СР.