20. 9. 2024: Автострада до Европы

Здає ся, же автострада до Европы буде проблематічна.

Покля на єднім боцї дотеперь стояла Україна, котра богорівным способом намагала ся пересвідчіти вшыткых, же вшыткы їй пожадавкы, вшыткы їй условія ці суперскорый процес приятя до Европской унії мусять быти сповнены, і є то гейбы моралный обовязок Западу, на другім боцї стояло властно лем Мадярьско, котре собі ішло класти свої пожадавкы. Вызерать то так, же тото ся мінить.

Звышок держав Унії, і кедь не зо вшыткым все были согласны, наконець была тихо, жадны реціпрочны пожадавкы державы не окдрывали, і Мадярьско, котре собі штось таке доволило, котре жадало забезпечены права своёй меншыны на Українї за підпору інтеґрачного процесу, было мінімално чудаком, кедь не державов, котра бы ся мала спаковати і одыйти з Унії.

Но лемже тот тыждень обявили ся в медіях інформації, котры вказують, же і в Бруселї варена-печена польска влада Доналда Туска має свої „граніцї“ безгранічной підпоры, а може мати так само свої пожадавкы, претензії.

Із медій могли сьме ся дочітати о тім, же послїдня стрїча україньского презідента (котрому перед часом скінчів мандат) із польскым міністром загранічных дїл Радославом Сікорскым не скінчіла „найлїпше“, кедь маєме хосновати діпломатічный словарь. Кедь ся того словаря не будеме тримати, пак то скінчіло бурёв.

Зеленьскый мав знова пожадавкы на Польщу, а знова то мало быти без будьякой реціпроціты. Верьховный командант україньскых озброєных сил мав якбач чутя, же бісїдує із ёму підпорядкованым, кедь мав повісти, же Польща ани не має піднимати вопрос Волинї, чім мала быти польска делеґація заскочена.

Сікорскый мав мати намагу пересвідчіти Зеленьского, же треба вырїшыти історічны польско-україньскы дїла, в тім ексгумацію жертв Волиньской масакры, і то з тым, же теперь за то заплатить Україна менше як в часї приступовых переговорів.

Што є найглавнїше, не знаме, ці вдяка Зеленьского выступу, або і без нёго, Польща, котра перебере презідію в Радї Европской унії од януара 2025-го року, хоче тот піврочный період схосновати на то, жебы на Кіїв зробити в тых дїлах тиск.

Теперь то прийде аж як сімболічне, же Мадярьско передасть штафету Польщі. Бо наконець то вызерать так, же інтересы тых двох держав, і кедь ся в многім розходять, а способ, як їх досягнути, не суть од себе аж так далеко.

Навеце, Польщу, котра історчіно не є поклонником Росії, котра од першых днїв помагать Українї, котра прияла міліоны біженцїв, дала Кієву зброю, через котру вшытка западна зброя входить на україньску теріторію, не мож обвинёвати з того, же бы служыла інтересам Кремля, кедь мать даякы пожадавкы на Україну, як ся то звыкне скорочено выяснёвати в припадї Мадярьска.

Зеленьскый мав жадати при тій самій стрїчі Сікорского, жебы почас польской презідії ускорило ся вшытко, што лем мож, жебы Україна скоро стала членом Унії.

Зеленьскый через трупы іде за высненым суперскорым процесом, котрый му реално нихто не обіцяв. Но по тім, што пришла (затля) мала діпломатічна буря, то уж ани не вызерать так, жебы такый великый дотепрїшнїй союзник як Польща безусловно про тото дїло палцём рушила.

Здає ся, же автострада до Европы, котру собі в Кієві выснили, буде проблематічна. Она може скінчіти подобно як єдина автострада з Братіславы до Кошіць, котру не знає Словакія докінчіти десяткы років. Іщі все хыбують даякы добудованы части.  В припадї Україны тоты части можуть быти в Мадярьску, а може уж і в Польщі.

 

Петро МЕДВІДЬ. Статя была написана як коментарь „Вступне до контроли“ лемківского радія lem.fm. Языкова і ґрафічна управа: АРК в СР.

Жрідло фотоґрафії: Pixabay.com