21. 1. 2021: Термін асістованого списованя буде довшый

Пандемія нового тіпу коронавірісу приность і зміны в списованю жытелїв, котре на Словакії має проходити од 15-го фебруара до 31-го марца 2021-го року. На засїданю влады Словацькой републікы, котре проходило в середу, 20-го януара 2020, схвалили продовжіня терміну асістованого списованя.

Пропозіція закона, котру приготовив Штатістічный уряд Словацькой републікы, теперь піде до парламенту. Там бы ся о тім мало голосовати лем формално, кедьже владна коаліція має в Народній радї Совацькой републікы конштітучну векшыну.

Списованя жытелїв буде на Словакії проходити першый раз повно електронічно. Старчіти ку тому буде компютер, смартфон ці таблет. Люде, котры не будуть годны списати ся такым способом самы, можуть пожадати о поміч асістентів, котрых буде мати кажде село і місто.

Таке асістоване списованя бы ся по новому мало в новім термінї, конкретно од зачатку апріля до кінця октобра 2021-го року. Причінов є, жебы ся не звекшовало різіко огрожіня здоровля найвеце зранительной ґрупы жытелїв хворотов COVID-19 в часї кулмінуючой пандемії.

Одностно пандемічной сітуації, на основі днешнёго рїшіня влады, посувать ся термін асістованого списованя, жебы сьме охранили зравя вшыткых участных. Асістоване списованя ся в смыслї новелы закона зачне од 1-го апріля і тырвати буде найпізнїше до 31-го октобра 2021-го року,“ повіла про аґентуру TASR ґенерална директорка Секції соціалных штатістік і демоґрафії Штатістічного уряду Словацькой републікы Людміла Іванчікова.

Списованя жытелїв рахує з тым, же особы, котры не суть в ставі самосписати ся електронічно, мають можность зробити то з асістентом. „В одношіню ку сітуації сьме пожадали о зміну закона, де сьме асістентів вытягли з того першого кола списованя і перенесли їх до другой части, до такзваного досписованя, котре сьме продовжыли до кінця октобра,“ повів председа Шатітістічного уряду Александер Баллек.

Значіть, покля хтось потребує асістента на списованя, треба раховати з тым, же асістенты будуть ходити аж по 31-ім марцу 2021.

Петро МЕДВІДЬ, ЛЕМ.фм, языкова управа: ред. АРК в СР.

Script logo