21. 10. 2018: В Калній Розтоцї учіли ся робити шындлї

Дня 11-го октобра 2018-го року в Калній Розтоці, окрес Снина, проходив воркшоп выробы деравяного шындлю. Головным орґанізатором події была безпрофітова орґанізація Карпатьскы деревяны церькви.

Якраз тота орґанізація од 2011-го року в реґіоні Снины робить проєкты на всокочіня, обнову і презентацію деревяных церьквей, але і далшых културных і церьковных памяток в тій русиньскій долинї. На воркшоп была закликана і Справа народного Парку Полонины, котрый ся в тій области находить.

 

Помогли і на дзвініцї

Воркшоп проходив паралелно із реконштрукціёв стріхы деревяной дзвініцї збудованой на переломі 19-го і 20-го столїтя, котра стоїть коло Ґрекокатолиицькой церькви св. Іоана Хрестителя із першой половины 18-го столїтя.

На стрісї дзвініцїі были на веце місцях пошкоджены шындлї, як інформовала фундація на своїй офіціалній сторінцї на сітї Facеbook. Выміна шындлїв уможнить, жебы дзвініця могла і далше фунґовати як дотеперь.

„Цїлём події была підпора і ожывлїня заникаючого традічного реґіоналного народного ремесла, што є в згодї із вартостями і цїлями розвитковой функції Меджінародной біосферічной резервації Выходны Карпаты, котрой є Народный парк Полонины частёв. Жебы ремесло жыло і културны вартости МБР Выходны Карпаты вдяка тому не упадали,“ написала фундація.

 

Шындлярьство там має традіцію

Староста села Ладіслав Гакулін проєкт в селї, як інформовав денник Korzár, привітав. Так само бы быв радый, кебы ся в селї нашов даякый шындлярь. Шындлї бы до околіцї требало і на далшы деревяны храмы, навеце тото ремесло мало в селї, але і цїлім реґіонї довгу традіцію.

„Подля доступных документів меджі обовязками жытелїв сел належало раз за рік дати панам 500 фалатків шындлїв на гуменьскый або михалївскый каштель. Втогды ту в лїсах росло і веце ялічок. Пізнїше тота традіція шындлярьства утримала ся лем в крайных селах як Новоселиця, Рунина і Осадне (даколи Телепівцї, позн. ред.),“ цітує денник реґіоналного історіка Мірослава Бураля.

 

Петро МЕДВІДЬ, лем.фм, жрідло фотоґрафії: Karpatské drevené cerkvi