21. 10. 2021: Малый каштель в Снинї уж обновленый

Місто Снина закінчіло реконштрукцію такзваного малого каштеля, єдной із штирёх народных културных памяток в історічнім ареалї міста. Інформовала о тім аґентура TASR.

Окрем Дому служебницьтва, як тот обєкт євідує Памятковый уряд Словацькой републікы, ревіталізовала ся і часть історічного парку, котрый є в сусїдтві будинку. Выникла там одпочінкова зона з озером.

Снина реалізовала реконштрукцію малого каштеля вдяка проєкту черезгранічной сполупраці проґраму ENI, в котрім має за партнера підкарпатьске місто Хуст. Реконштрукція проходила єден рік. В зреконштруованій будові хоче самосправа реалізовати творчі варштаты про дїти, але і іншы варштаты про вшыткы віковы катеґорії. В пивнічных просторах ся мають презентовати локланы продукты, включно їх выробы.

Ревіталізація околіцї малого каштеля в історічнім парку, яка была фінанцована з підпоров проєкту черезгранічного проґраму Interreg, обсяговала обнову озера, котре было зроблене у 19-ім столїтю, і было ліквідоване почас комуністічного режіму, а так само выбудованя алтанку і дакілько ходників.

Дім служебницьтва збудованый на початку 19-го столїтя реконштруовали остатній раз в 1950-ых роках. Пак будинок аж до 1970-го року служыв на освітнї цїлї.

 

Петро МЕДВІДЬ, Лем.фм. Ґрафічна і языкова управа: ред. АРК в СР. Фото: TASR.