21. 6. 2016: Україньскы посланцї підтримують народностны автономії. О Русинах буде діскузія

Україньскый презідент Петро Порошенко выступать за росшырїня прав народностных меншын, головно за вытворїня народностной автономії кримскых Татарів. Інформує о тім україньскый портал „Єдність“.

Презідентову ініціатіву підпорили і дакотры посланцї Верьховной рады Україны. Сергій Євтушек із патрії „Батьківщина“ про портал повів, же вєдно із народностно-теріторіалнов автономіов кримскых Тататрів, такы права треба дати і іншым народностным меншынам у складї сувереннoй і незалежной Україны.

Нелем про Татарів

Петро Юрчішін, котрый є в україньскім парламентї за Блок Петра Порошенка быв у анкетїпорталу так само согласный з такыма думками. Навеце повів, же кажда народностна меншына бы мала мати свою малу „отцюзнину“. Підпорив го і депутат Григорій Заболотный з той самой політічной партії.

„Подля поглядів експертів механізм реалізації права кримскых Татарів, закарпатьскых Русинів і Мадярів, Булґарів Одеской области, Румунів Чернівецькой і Закарпатьской областей, іншых народностных меншын Україны на народностно-теріторіалну автономію мусить быти ясно записаный в Конштітуції Україны, в далшых норматівно-правных актах, жебы забранити маніпулації. І ту є важне схосновати европску скушеность з вытворїня народностно-теріторіалных автономій,“ пише дале портал „Єдність“.

Припоминаме, же рїзны формы народностных автономій, або лїпше повіджено народностных самосправ (в каждій державі на властных прінціпах), можеме відїти в державах, як Мадярьско, Сербія ці Румунія. Навспак, дотеперь такы формы упорядкованя жывота народностных меншын не суть в Польщі, Словакії або Чеській републіцї. Но і в тых державах суть народностны меншыны підпорованы, мають свої права і можуть розвивати свій културный жывот, припадно розвивати своє властне школство.

Портал „Єдність“ дале підкреслює, же Україна так само підписала Рамковый договор на охрану народностных меншын (1995-ый рік), а і далшы міджінародны документы, котры дотуляють ся прав меншын. Вытворїня народностных автономій, або самосправ, так треба принимати в контекстї обовязків, котры Україна на себе преревзяла підписанём міджінародных договорів. Подля порталу бы были народностно-теріторіалны автономії путь до того, як вылучіти причіны напятя міджі жытелями державы, причіны соціокултурной конфронтації, а так само бы то помогло реґіоналному розвитку і всокочіню країны.

О Русинах роблять „округлый стіл“

Днесь не є ясне, ці такы формы автономій або самосправ на Українї будуть схвалены україньскым парламентом і наслїдно підписаны презідентом Порошенком. Єднако так є днесь тяжко повісти, в якій позіції бы в припадї схвалїя автономій про меншыны были Русины, котры дотеперь не суть Українов узнаны як окремый народ. Но вже тот тыждень має у Києві проходити „округлый стіл“, якый має занимати ся вопросом Русинів. (Позн. ред.: Портал Фенікс – Слово інформовав, же про сповнїня наряджіня презідента Україны „Національний інститут стратегічних досліджень‟ 23. юна 2016 року зорґанізовав «круглый стіл» на тему «Русинство в сучасній Україні: історія, реалії та виклики сьогодення».

П. M., фотоґрафія: theglobalstate.com