21. 6. 2017: Ювілей проф. Генрика Фонтаньского
Днес, то є 21. червця/юнія, о 14.00 год. в аули ім. Казімєжа Поляньского на Шлезскым Університеті проходила буде специяльна ювілейна стріча з нагоды 70. річниці народжыня проф. Генрика Фонтаньского – спілавтора популярной серед лемківской соспільности публикациі Ґраматыка лемківского языка (2000).
Генрик Фонтаньскій єст польскым лінґвістом, русицистом зо ступньом звычайного професора. В роках 1971-1978 выкладал росийскій язык в Высшій Педаґоґічній Школі в Ополи, а в 1978 році зачал працувати на Шлезскым Університеті в Катовицях, де долгы рокы был директором Інституту Східньославяньской Філолоґіі Філолоґічного Выділу. Од початку 90. років ХХ ст. активні спілпрацує з Лемками в обшыри кодифікациі лемківского языка. В обшырным науковым доробку проф. Г. Фонтаньского находит ся вельо публикаций тыкаючых проблемів лемківского языка, м.ін. Студия над лемківскым синтаксисом (2014) ци спомнена уж Ґраматыка лемківского языка (2004).
Лемківскє середовиско на тій ювілейній стрічы репрезентувати будут др габ. Олена Дуць-Файфер, яка выступит з доповідьом пн. Язык-література-достоменніст: дискурс сучасной лемківскости, та Петро Трохановскій і Мирослава Хомяк. З нагоды ювілею печатана была специяльна публикация дедикувана професорови пн. Світ за текстом.
Ювілятови желаме многых і благых літ!
На знимці проф. Генрик Фонтаньскій вчас выступліня на ІV Медженародным Конґресі Русиньского Языка, котрий проходил в вересни/септембри 2015 рока в Пряшові, фот. архів ЛЕМ.фм.
(Публікуєме в оріґіналї – лемківскім варіантї русиньского языка.)
