21. 7. 2017: До музею Варгола прибыв Молоток і серп

До Музею модерного уменя Енді Варгола в Меджілабірцях прибыли два новы експонаты. Музею їх запожычіли пріватны зберателї і іде о раріты. Єднов є цїнне портфоліо Молоток і серп (Hammer and Sickle), другов штири портреты свазійской кралёвной Нтомбі Твала (Ntombi Twala). Інформовав о тім словацькый денник Korzár.

 

Молоток і серп

 

Варголів Молоток і серп в музею – то шпеціална едіція. Выдрукованых їх было лем десять. В міджілабірьскім музею ся теперь находить протфоліо під чіслом два.

 

„На образах Варгол методічно вказав як выникать сітёдрук, як ся окремы верствы передрукують, аж покля не виникне фіналный твор,“ повів про денник Михал Бицко, єден із основателїв музею і сучасный главный ёго куратор.

Варгол ся мав мотівом молотків і серпів іншпіровати почас своёй навщівы Італії в роцї 1977, кідь то збачів як ґрафіты на стїнї. Іщі в тім роцї зробив дакілько варіацій того мотіву. Подля Мартіна Цубяка, презідента Общества Енді Варгола, хоць умелець тот твор зробив в часї кулмінуючой етапы студеной войны, рефлектовав в нім прімарно совєтьскый сімбол комунізму як ёго іконічный прояв, а не інтересовала го політіка.

 

Африцька кралёвна

 

Новым експонатом суть і штири портреты свазійской кралёвной. Суть в красній фаребній комбінації. Іде о авторьскый друк, значіть, істо ся їх дотулила рука Варгола, інформовала денник Кармен Ціліпова з музею. Портрет быв так само вытвореный техніков сітёдруку, котру Варгол хосновав скоро при вшыткых своїх творах і спопуларізовав єй про уменя другой половины ХХ. стороча.

 

 

Інтересностёв є лінка творена сваросвского крішталиками, котры придавають образу ґланц. Завів то якраз Варгол, пояснила далше Ціліпова походжіня тзв. діамантового пороху на образах.

 

В Меджілабірцях од року 1991

 

Музей модерного уменя Енді Варгола в Меджілабірцях офіціално вынкнув 1-го септембра 1991-го року. В тім часї быв єдиным такым музеём на світї. Днесь є єдным із двох, но все зіставать єдиным в Европі. Другый такый музей є в америцькім місті Піттсбурґ. Джон Варгола, Михал Бицко і Михал Ціглаж были головныма ініціаторами выникнутя того музею. Музей моментално властнить 160 творів краля поп-арту.

 

П. М., жрідло фотоґрафій: korzar.sme.sk