21. 7. 2017: Русиньске Лїто з Ракоціём

Місто Пряшів тот рік святкує 770-ту річніцю од першого писемного документу о містї. В рамках того цїлый рік проходять різны културны події. Частёв тых святковань є і серія подій під назвов Лїто з Ракоціём, котру приготовлює Крайскый музей в Пряшові і цілём є представити різны културы, котры жыють на теріторії міста Пряшів.

 

Найблизша недїля, 23. юлія 2017-го року, буде Лїто з Ракоційом належати Русинам. Од 15.00 год. будуть годны навщівници Крайского музею спознавати русиньску културу і жывот Русинів на теріторії міста Пряшів. В сполупраці зо Словацькым народным музеём – Музеём русиньской културы в Пряшові буде одпрезентована богата історія і народна култура посередництвом лекцій, выставкы, но і выступлїня музикантів.

 

Як інформовала денник Korzár директора Крайского музею в Пряшові Марія Которова, лекції будуть мати Ольґа Ґлосікова, директорка СНМ – Музею русиньской културы і Анна Кузмякова. В проґрамі будуть выступати Фолклорна ґрупа Стропковяне і Моніка Кушнірова з музичным супроводом. Частёв проґраму, подля слов директоркы, буде і коментована переглядка етноґрафічной експозіції Крайского музею зо зверненём увагы на русиньскы елементы в народній културы реґіону Шаріш.

 

Покровительство над подіов превзяв Петер Худік, председа Пряшівского самосправного краю і Андреа Турчанова, пріматорка міста Пряшів. Сердечно запрошаме.

 

П. M.