21. 7. 2025: Вышла книга о Меджілабірцях із пера Володиміра Противняка

Володиміра Противняка знаме як бывшого председу Русиньской оброды на Словеньску ці секретаря Світового конґресу Русинів. Родак із Выдрани, днесь містьской части міста Меджілабірцї, недавно выдав книгу, котра занимать ся історіёв того русиньского міста на северовыходї Словакії.

Меджілабірцї в дзеркалї історії (Medzilaborce v zrkadle dejín), то 566-сторінкова публікація, котру выдало місто Меджілабірцї і святочно єй одпрезентовали почас 63-го рочника Фестівалу културы і шпорту, якый в містї проходив на кінцю юна 2025-го року.

„Автор як довгорічный робітник Містьского уряду в Меджілабірцях, посланець, обчаньскый актівіста, председа общественных орґанізацій быв частков дїяня в містї, і то му уможнёвало орьєнтовати ся в нелегкій задачі. На книжцї робив сім років, черьпав із доступной літературы, двох десяток кронік міста Меджілабірцї, обчаньскых здружінь, колектівів, школ і множества особных розговорів,“ пише выдаватель.

Публікація має 37 капітол, є доповнена коло 900 фотоґрафіями, якы суть скапчаны із обсягом. „Є богатов выповідёв захоплюючов історічны меджі в жывотї обывателїв міста.“

Тота унікатна книга о Меджілабірцях чітателїв проведе сторочами, од першых писемных згадок аж по сучасность, і розкрыє скрыты історії, котры формовали Меджілабірцї і їх обывателїв, інформує місто.

Як далше чітаме в анотації, в книзї пише ся о вызначных дїях і переломных моментах, котры овпливнили історію міста, суть в нїй цїнны знимкы і історічны документы, познакомити ся вдяка нїй мож із вызначныма особностями, котры народили ся або дїяли в містї, і лишыли по собі незмазательный слїд.

„Тота книга є веце як лем історічна публікація. То одданя чести нашому місту і ёго людям. Ідеална є про каждого, хто інтересує ся історіёв, про родаків, але і про турістів, котры лїпше хоять спознати Меджілабірцї.“ Книжку мож дістати на Містьскім урядї в Меджілабірцях.

Петро МЕДВІДЬ, ЛЕМ.фм, языкова і ґрафічна управа: АРК СР.