21. 8. 2024: Реконштрукція Музея Варгола іде подля плану

Реконштрукція Музея модерного уменя Енді Варгола в Меджілабірцях продовжує подля плану. До кінця календарьного року бы мала быти в рамках перебудовы проінвестована сума 12,7 міліона евр.

Почас контрольного дня 19-го авґуста 2024-го року то повів председа Пряшівского самосправного краю (ПСК) Мілан Маєрьскый, інформує аґентура TASR. На реконштрукцію і модернізацію музея ПСК хоснує властны фінанції і дотацію од державы.

Дїло меджінародного значіня

За словами Маєрьского почас реконштрукції появили ся і непланованы роботы, котры выжадали собі додаточны кельчікы в сумі приблизно 400 тісяч евр.

„Початком слїдуючого року бы сьме хотїли зачати з роботами в інтерьєрі музея. Очекуєме так само підпору од сучасной влады, жебы сьме годны были комплексно докінчіти тото велике дїло, котре має надреґіоналне і меджінародне значіня,“ додав.

Почас пандемії COVID-19 пришов край о часть фінанцованя в сумі 1,7 міліона евр, што было запричінене заставлїнём робот. За словами пряшівского жупана вже мали єдну стрїчу з премєром і Міністерство фінанцій Словацькой републікы, де было потверджено, же є інтерес тото дїло фінанчно підпорити.

Імпулз про турістічный рух

Реконштрукція музея має створити модерный і мултіфункчный простор, котрый буде сповняти сучасны пожадавкы і очекованя навщівників, повів директор музея Мартін Цубяк.

„Ключовым было зробити з той будовы, котра на першый погляд не была вабнов, мултіфункчный, мултіжанровый і барз інтерактівный простор. Напало нам, же унікатным рїшінём бы было скапчати інтерьер із екстерьєром, і то якраз посередництвом стрїхы і фасады, по котрых дає ся ходити, посередництвом выужытя стрїхы як будучіх експозіцій,“ додав Цубяк.

Подля пріматора Меджілаборець Владислава Вышнёвского зреконштрукованый Музей модерного уменя Енді Варгола буде імпулзом про турістіку в реґіонї.

„Турістічный рух в Меджілабірцях буде мати цалком іншу дінаміку. Тяжко здогадати, кілько турістів ту прийде. Кедь ту ходило 50 – 70 тісяч турістів, та теперь то буде многократно веце. На тото приготовлюють ся і бізнісовы субєкты, котры інвестують до турістічного руху в цїлім окресї, значіть, взникають новы просторы про уквартелёваня і стравованя,“ повів Вышньовскый.

Реконштрукція почала в апрілю 2023-го року, одкрытя музея є плановане найпізнїше в місцяцї юл 2025-го року.

Петро МЕДВІДЬ, ЛЕМ.фм, языкова і ґрафічна управа: АРК в СР.