22. 11. 2018: Европарламент хоче єднакы, всядыль ґарантованы права про меншыны

Европскый парламент апеловав у віторок, 13-го новембра 2018-го року,на приятя сполочных правил в рамках Европской унії, котры бы забезпечіли решпектованя прав членів народностных меншы і заставили їх діскрімінацію.

Інформовала о тім словацька державна пресова аґентура TASR. Европосланцї за аґентурныма інформаціями пожадали Европску комісію, жебы выпрацовала і передложыла пропозіцію інштрукції, яка бы задефіновала мінімалны нормы про меншын Европской унії. В інштрукції бы мали быти і ясны крітерії ці крокы заміряны на закінчіня діскрімінації меншын в членьскых державах.

Мати менше ненавистных проявів

Корешпондент узнесїня, словацькый европосланець мадярьского походжіня Йожеф Надь із партії Most-Híd в інформації про медії выразив, же найважнїшым цілём є знижыти чісло ненавистных проявів і проблемів, котры із них выходять.

„Вшыткы обчане Европской унії бы мали мати можливость без страху хосновати свій материньскый язык на уліцї ці у публічных просторах. Радо бы сьме выбудовали мосты меджі векшыновов і меншыновыма културами, жебы годны были взаємно акцептовати ся і підтримовати. Европска унія мусить решпектовати свою языкову і културну розмаїтость,“ повів о сітуації Надь.

Як далше інформовала аґентура, за нелеґіслатівну резолуцію голосовало 489, 112 членів европарламенту было проти і 73 европосланцїв ся стримало голосованя. Резолуція апелує, жебы ся довєдна про вшыткых дефіновав термін народностной меншыны, што бы мало односити ся на дефініцію в Европскім договорї о людьскых правах.

Ґаранція практікованя меншыновых прав

Посланцї так само підкреслили, же членьскы державы Европской унії бы мали забезпечіти про вісем процент обчанів унії, котры належать ку народностным меншынам, можность практіковати свої права в области културы, языка і освіты, і высловили ся за вытворїня цїлоунійной сістемы на охрану меншын і пробаданя внутрішнёдержавных меншыновых політік.

Депутаты акцентовали і важность охраны реґіоналных і меншыновых языків, котрыма того часу бісїдує приблизно десятина жытелїв Европской унії. Схвалена резолуція апелує на Европску комісію і членьскы державы, жебы прияли крокы заміряны на підпору хоснованя реґіоналных і меншыновых языків у освітнїх інштітуціях і в медіях.

Петро МЕДВІДЬ, лем.фм