22. 2. 2025: Меншныны собі выбрали представителїв у народностній радї. Трёх выберали і Русины
Членами Рады будуть в далшім функчнім періодї Медвідь, Караш і Піліп.
Народностны орґанізації собі зволили членів Палаты народностных меншын Рады влады Словацькой републікы про народностны меншыны. Резултаты голосованя в пятніцю, 21-го фебруара 2025-го року, публіковав Уряд уповномоченого влады СР про народностны меншны на офіціалнім сайтї.
Были то першы вольбы до Рады, на їй перше засїданя, яке одбыло ся в януарї того року, были за окремы народностны меншыны кооптованы членове, котры были перед тым членами Выбору про народностны меншыны і етнічны ґрупы Рады влады Словацькой републікы про людьскы права, народностны меншыны і родову рівность.
О вольбы быв великый інтерес
Голосовати у вольбах до Рады моголо ся поштов або особно.
Як пише ся на сайтї уповномоченого, день по встановленім термінї доручіня і переданя листків на голосованя (21-го фебруара, позн. ред.) в просторах Уряду влады Словацькой републікы за участи волебной комісії і нотаря одбыло ся одкрываня коперток волителїв народностных орґанізацій, котры „доказательно анґажують ся в области підпоры захованя і розвитку ідентіты і културы членів народностных меншын, котры собі зволили членів Рады“.
„З боку 14-ёх народностных меншын быв о вольбы вынятково высокый інтерес. Условія про реґістрацію до волеб сповнило довєдна 206 народностных орґанізацій, із котрых на волебній громадї брали участь представителї 187-ох із них,“ інформує сайт уповномоченого.
Членами волебной комісії, як далше чітаме, были представитель Канцеларії председы влады Словацькой републікы, представитель Уряду влады СР, і представитель Уряду уповномоченого влады СР про народностны меншыны. Із волебной громады была списана і нотарьска записніця.
Русины мали девять кандідатів
В новоствореній Радї влады СР про народностны меншыны мають Русины трёх членів, як і в попереднїм выборї. Чісла членів народностной палаты не мінили ся в порівнаню з народностным выбором, лем Мадяры, котры мали у выборї пять членів, мають в новім опрґані сім членів.
Ромове мають штирёх, Українцї і Чехы по двоє членів, решта надодностных меншын має по єднім представителёви.
Округлый стіл Русинів Словакії вєдно із Русиньсков обродов на Словеньску і далшыма партнерьскыма орґанізаціями в кооперації номіновали до волеб за членів Мартіна Караша, Петра Медвідя і Мілана Яна Піліпа, котры были пред тым і членами народностного выбору. Тоты орґанізації так само номіновали на заступників членів Йосифа Бадиду, Матфея Допіряка і Петра Штефаняка.
Од далшых орґанізацій пришли іщі три номінації на члена рады. Номінованы были Мірослав Кереканіч, Ян Маґура і Александер Онуфрак.
Вольбы до народностного выбору проходили так, же ся окремо голосовало за членів, і окремо за заступників членів. Теперь ся правила змінили, і до новой Рады кажда номінація наконець была брана як номінація на члена Рады, а не голосовало ся окремо за заступників членів. На другім боцї каждый, хто кандідовав, став автоматічно заступником члена, і кебы не мав ани єден голос.
За порядком, котрый публікованый є на сайтї уповномоченого, членамы Рады влады СР про народностны меншыны стали Петро Медвідь, Мартін Караш і Мілан Ян Піліп.
Заступниками членів стали Александер Онуфрак, Мірослав Кереканіч, Ян Маґура, Петро Штефаняк (єднаке чісло голосів), і Матфей Допіряк.
Понад 40 орґанізацій приголошеных до волеб
Русины, котрых приголосило ся в послїднїм списованю жытелїв із 2021-го року 63 556 особ, мали до волеб зареґістрованых 42 орґанізацій.
Про порівнаня, ромска меншына, ку котрій голосить ся 156 164 людей, мала зареґістрованых 54 орґанізацій, а Мадяры, котрых є за остатнїм списованём 456 154 на Словакії, зареґістровали 85 орґанізацій, котры голосовали у вольбах.
Меджі русиньскыма орґанізаціями, котры мали „доказательно анґажовати ся“ в русиньскім русї, нашли ся наконець і такы інтересности як Біціґлёва і Ліжарьска Турістічна Ґрупа о. з. (Bicyklová a Lyžiarska Turistická Skupina o. z.), Клуб воєньской історії і стрїлецькый клуб Годошік (KVH a strelecký klub Hodošík) ці Обчаньске здружіня пріватных властників нерухомостей (Občianske združenie súkromných vlastníkov nehnuteľností).
Мандат, котрый здобыли членове Палаты народностных меншын Рады влады Словацькой републікы про народностны меншыны, платить на штирирочный функчный період. Єндакый мандат мають і заступници членів.
Найблизше засїданя Рады бы мало одбыти ся на переломі місяців апріль і май, а буде проходити уж з новозволеныма членами.
Петро МЕДВІДЬ, ЛЕМ.фм, языкова і ґрафічна управа: АРК СР.
