22. 4. 2016: Іріна Гарді-Кoвачевіч оцїнена літературнов преміёв

Як інформує аґентура Рутенпрес, Общество писателíв Войводины выголосило інформації о тім, хто дістане того року премії за літературны творы. Міджі нагородженыма є і русиньска писателька Іріна Гарді-Ковачевіч, котра дістане премію Мірослава Стрібера за приповідкову книжку „Нєбо над Керестуром“.

Книжку леґенд і приповідок „Нєбо над Керестуром“ выдало „Руске слово“. Была выдана і як авдіокнижка, котру можуть знати слухачі лем.fm з высыланя радіа. Порота, котра рїшаєла о тогорічных преміях, у своїй інформації о резултатах оцїнїня авторів окремо звертать увагу на конціпованость книжкы і факт, же Іріна Гарді-Ковачевіч як перша в русиньскій войводиньскій літературі приносить до своїх приповідок чудесных фантазійных героїв, і їй творчость є в тім овпливнена майстром славяньского повіданя – Ґоґолём.

Іріна Гарді-Ковачевіч (1944) ся народила в Рускім Керестурї. В Кулї закінчіла Середню економічну школу. У тім фаху робила лем курто. Любов ку літературї єй привела до редакції „Руске слово“. В часї, кідь зачала робити журналістку, зачінать і свою літературну творчость. До літературы вступила як поетка і шырша публіка єй знать головно через поезію. Першу збірку выдала у 1969 під назвов „На дланї заренко“. Коло журналістічной роботы закінчує і Філозофічну факулту у Новім Садї.  По часї одходить із редакції „Руске слово“ і в рр. 1974 – 1981 є редакторков молодежного часопису войводиньскых Русинів „МАК“. Потім аж до року 1987 знова робить в редакції ґазеты „Руске слово“, но уж як головный редактор новинок. В роцї 1987 переходить до „Дневника“, де робить редакторку културной рубрікы, і пізніше робить як слободный репортер аж до свого одходу на пензію у 1999 роцї. Жыє у Новім Садї.

Писателька свою премію дістане 27-го апріля 2016-го року, коли буде офіціалне передаваня премій нагородженым Обществом писателїв Войводины.

Жрідло фотоґрафій: Рутенпрес

П. М.