22. 6. 2017: Умер Іван Бандуріч

Дня 21-го юнія 2017-го року у віцї  83 років умер в Бардеёві русиньскый актівіста, културно-сполоченьскый діятель Іван Бандуріч.

Іван Бандуріч надородив ся 7-го юнія 1934-го року у Стриговцю, в окресї Снина. Быв чоловіком, котрый стояв при початках русиньского возродного процесу на Словакії по роцї 1989, і котрый у тім русї быв актівный аж до кінця. Быв основателём Русиньской оброды – Реґіоналного клубу в Бардеёві, довгорічным членом Коордіначного выбору Русиньской оброды і членом Рады влады СР про народностны меншыны і етнічны ґрупы за Русинів.

Почас свого продуктівного віку Іван Бандуріч перешов многыма функціями у сферї културы, охраны културных памяток і сполоченьско-політічного жывота. Наприклад, він быв і основателём Окресной памятковой справы в Бардеёві і довгорічным директором той інштітуції (1971 – 1992). Обновлїня історічного центра міста Бардеёв, выбудованя сканзену в Бардеёвскых Купелях і много далшого – у тім вшыткім мав заслугы як раз він.

Нелем русиньска громада, але і културна громада Словакії в Іванови Бандурічови страчать великого діятеля. За вшытко, што зробив за свій жывот на благо Русинів і културы на Словакії, му належыть велика подяка.

Погріб І. Бандуріча буде в пятніцю, 23-го юнія 2017-го року, на Великім цінтерю в Бардеёві. Погріб зачінають о 15.00 год.

Вічная ёму память!